विराटनगर । तेस्रो संस्करणको मिल्स कप टि–२० क्रिकेट प्रतियोगितामा भारत विहारको कटिहार क्रिकेट क्लब सेमिफाइनलमा पुगेको छ । आज भएको दोस्रो खेलमा कटिहारले दिल्ली क्रिकेट क्लबलाई ३० रनले हराउँदै सेमिफाइनलमा पुगेको हो ।

कटिहारले १९.१ ओभरमा सबै विकेट गुमाइ १६५ रन बनाएको हो । कटिहारका मयङ्कले १५ बलमा ३२ रन पारी खेल्दा करन कुमारले २७ बलमा ३१ रन बनाए । एजमल राजले १४ रन, अभिषेक कुमारले ११ रन बनाए । दिल्लीका निरु र शिवम किशोरले समान ३–३ विकेट लिए । विकास र सन्दिपले समान २ –२ विकेट लिए ।

कटिहारले दिएको १६६ रनको विजय लक्ष्य पछ्याएको दिल्लीले १८.५ ओभरमा सबै विकेट गुमाइ १३५ रन मात्रै बनायो । जसमा दिल्लीका सत्यजित राउतले ३१, विकास लोहीले २७ रन बनाउदा विराट कार्कीले २५ रनको योगदान दिए ।
कटिहारका कुलदिप आलमले ३.५ ओभरमा २० रन खर्चेर ५ विकेट लिए । कसिलो बलिङ गर्ने उनी प्लेर अफ द म्याच घोषित भए । भानु आन्नदले ४ ओभरमा १९ रन खर्चेर ३ रन बनाए ।
शनिबारको पहिलो सेमिफाइनल खेल विराटनगरको वाइआरसीसी र एनबीएससी क्रिकेट क्लबबीच हुनेछ ।