विराटनगर । मापदण्ड विपरीत खोला उत्खनन गर्ने ठेकेदार कम्पनीलाई कटहरी गाउँपालिकाले जरिवना गरेको छ ।
गाउँपालिकाको बुधबार बसेको कार्यपालिका बैठकले मापदण्ड विपरीत खोला उत्खनन गर्ने विराटनगर ६ स्थित श्री आर.सी. सप्लायर्स एण्ड कन्स्ट्रक्सन प्रालिलाई १ लाख रुपैयाँ जरिवना गरिएको हो ।

कटहरी गाउँपालिका – ६ चतारी घाट र सतार बस्तीका सयौं घरपरिवारलाई असर पुग्ने गरी लोहन्द्रा खोलामा गरिएको अवैध उत्खनन पुर्नुपर्ने निर्णाय पनि कार्यपालिका बैठकले गरेको कटहरी गाउँपालिकाका अध्यक्ष देवराज चौधरीले बताए । ‘मापदण्ड विपरीत उपकरणहरु खोलामा पसाएर गरिएको उत्खननले थुप्रै खाडलहरु बनेको छ । त्यो खाडल पुरेपछि कार्यपालिकाले गरेको निर्णाय अनुसार १ लाख रुपैयाँ जरिवना गरेपछि मात्रै बरामद गरिएको ट्याक्टर र उत्खननमा प्रयोग भएको उपकरण दिने हो,’ अध्यक्ष चौधरीले भने, ‘खाडल नपुरेसम्म र जरिवना रकम तोकेसम्म हामी उपकरण दिने छैनौं ।’

२३ फागुनमा श्री आर. सी. सप्लायर्स एण्ड कन्स्ट्रक्सन प्रालिले मापदण्ड विपरीत उपकरणहरु प्रयोग गरी उत्खनन गर्दै गरेको अवस्थामा गाउँपालिकाले ट्याक्टरसहित उत्खननमा प्रयोग भएको उपकरण बरामद गरेको थियो ।
दैनिक अवैध उत्खननले कटहरीको चतारी घाट र सतार बस्तीका दुई सय सय बढी घरिपरिवार उच्च जोखिममा छन् । कटहरी गाउँपालिकाका अध्यक्ष देबराज चौधरीको नेतृत्वमा प्राविधिकसहित स्थलगत निरीक्षणको क्रममा ठेकेदार कम्पनीले १० देखि १५ फिट गहिरो उत्खनन गरेको पाइएको थियो । जुन मापदण्ड विपरीत रहेको कटहरी गाउँपालिका अध्यक्ष चौधरीले बताए । ‘आइईइ प्रतिवेदन र सहमति विपरीत ठेकेदार कम्पनीले उत्खनन गरेको पाइएको छ ।

१० देखि १५ फिट गहिरो खाडल बनाएर उत्खनन गरेको हामीले अनुगमनको क्रममा भेटिएको छ । उपकरणहरू उत्खननमा प्रयोग गर्न नपाइने लिखित सम्झौता गरिएको छ । तर, यहाँ तीन मिनेटमा ट्याक्टर र टिपरमा लोड गरिने उपकरणहरू भेटिएको छ,’ अध्यक्ष चौधरीले भने ।

धनपालथान र कटहरी गाउँपालिकामा पर्ने लोहन्द्रा खोला बलुवा र भरौट झिक्ने ठेक्का २०८० मंसिर ८ गते ठेक्का लागेको हो । श्री आर सी सप्लायर्स एण्ड कन्स्ट्रक्सन प्रालिले १ करोड ३२ लाख १६ हजार ५९२ रुपैयाँमा ठेक्का लागेको छ । ठेक्का सम्झौता अवधि २०८१ जेठ मसान्तसम्म रहेको छ । सम्झौता पत्रमा सप्लायर्सको तर्फबाट प्रतिनिधी रामकुमार श्रेष्ठले हस्ताक्षर गरेका छन् । श्रेष्ठ हस्ताक्षर गरेपनि खोला ठेक्का भने कटहरीका स्थानीय नेपाली काँग्रेस कटहरी २ का सभापति युवा नेता सन्जय मण्डलले लिएका हुन् ।