विराटनगर । मोरङ प्रहरी प्रमुख भएर आएका नयाँ एसपी नवराज कार्कीले सादा पोषाकमा परिचालन हुने घुमुवा प्रहरी हटाएका छन् ।

सूचना संकलनका लागि भनेर यसअघि परिचालन भएको पाँच जना सादा पोशकका प्रहरीलाई फिर्ता बोलाएर उनीहरुको दरबन्दी रहेको जिल्लामा सरुवा गरेका हुन् ।

यसअघिका एसपी दिपक पोखरेलले राखेका सादा पोशकका वरिष्ठ नायव निरीक्षक राजेन्द्र कटुवाल, सहयाक प्रहरी हवल्दार सुर्दशन कालाखेती, प्रहरी जवानहरु चुडामणि सुयल, अमृत श्रेष्ठ र काचुम भोटेको सरुवा गरेका छन् । उनीहरू काजमा मोरङमा बसेका थिए । सादा पोशाकमा खटिएका प्रहरीलाई फिर्ता बोलाएर दरबन्दी भएको ठाउँमा एसपी कार्कीले पठाएका छन् । वरिष्ठ नायव निरीक्षक कटुवालको उच्च अदालत विराटनगरमा, सहायक प्रहरी हल्दार कालाखेतीको जिल्ला प्रहरी कार्यालय खोटाङ, प्रहरी जवानहरु अमृतको तह्रथुम, भोटेको ओखलढुङ जिल्ला प्रहरी कार्यालयमा सरुवा भएको हो । सरुवा भएका प्रहरीहरुले मंगलबार रमना बुझेर दरबन्दी भएको ठाउँमा गएका छन् । यसअघि सादा पोशकमा रहेका प्रहरी सहायक हल्लदार गणेश श्रेष्ठ प्रहरी चौकी बखरीमा रहेका छन् ।
मोरङ प्रहरी प्रमुख एसपी कार्कीले संगठनको नियमित सरुवा प्रक्रिया अन्र्गत दरबन्दी भएको ठाउँमा गरिएको बताए । ‘दरबन्दी भएको ठाउँमा पठाउने संगठनको नीति नै रहेको छ । तेही अनुरुपा प्रदेश प्रहरी कार्यालयले दरबन्दी भएको ठाउँमा पठाएको हो,’ उनले भने, ‘अहिले तत्काल सादा पोशकको प्रहरी राख्नुपर्ने जरुरी छैन । आवश्यकता अनुसार राखिने हो । अहिले राखिने छैन ।’
नयाँ एसपी कार्की सोमबार मोरङ प्रहरीमा आएर कार्यभार समालेका छन् । उनी आएको भोलीपल्ट सादा पोशकका प्रहरीलाई फिर्ता बोलाएर दरबन्दी भएको ठाउँमा सरुवा गरेका हुन् ।