विराटनगर । जिल्ला ट्राफिक प्रहरी कार्यालय मोरङले जिल्ला भित्र गुडिरहेका सवारी साधनहरूलाई चेकिङ गर्ने क्रममा नम्वर प्लेट स्पष्ट नभएका सवारी साधनहरूलाई अन द स्पोट नम्वर लेखाउने अभियान सुरु गरेको छ । ट्राफिक व्यवस्थापन तथा सवारी दुर्घटना न्युनिकरण गर्ने अभियानका रूपमा यस कार्यलाई निरन्तरता दिएको मोरङ ट्राफिक प्रहरी प्रमुख प्रहरी निरीक्षक सुमन न्यौपानेले बताए ।

जिल्ला तथा मातहत समेतका पोष्टहरूवाट यस हप्तामा मोटर साईकल, वस, कार , टेक्टर, सिटी रिक्सा, टेम्पो गरी ४८४ लाई नम्वर लेखाउने काम भएको उनले बताए । विभिन्न सरकारी कार्यालयका सवारी साधनहरू, विधालयका गाडिहरू, एम्वुलेन्स, फोहोर वोक्न प्रयोग भएको ट्याक्टरहरू समेतको प्रष्टसँग नम्बर प्लेट नलेखेको पाइएको थियो । नम्बर प्लेट प्लेट स्पष्ट नभएका सवारी साधनहरूलाई अन द स्पोट नम्वर लेखाउन लगाएको उनले बताए । ‘ नम्वर प्लेट स्पष्ट नहुदा सवारी दुर्घटनामा सम्लग्न भएका सवारी साधनहरूलाई पहिचान गरी कानुनी कारवाहीमा ल्याउन पनि धेरै समस्या हुन्छ,’ उनले भने, ‘त्यसैले पनि नम्वर प्लेट स्पष्ट नभएका सवारी साधनहरूलाई अन द स्पोट नम्वर लेखाउने अभियान सुरु गरिएको हो ।’ यो अभियानलाई जिल्लाभरीमा निरन्तार दिने उनले बताए ।