विराटनगर । नेपाल पाराभेटेरिनरी एण्ड लाइभस्टक एसोसिएसन कोशी प्रदेशले बिहीबार विराटनगरमा दुध उत्पादक, संकलन र उद्योगीहरु तथा सरकारी निकाय सम्मिलित एक कार्यक्रम गर्यो । केन्द्रको कृषि विभाग, कोशी प्रदेशको उद्योग, कृषि तथा सहकारी मन्त्रालयका अधिकारीहरु सहभागी कार्यक्रममा दूधको निर्यात कसरी गर्ने र बजार व्यवस्थापन कसरी गर्ने भन्ने विषयमा छलफल भयो ।
छलफलका क्रममा व्यवसायीहरुले भारतबाट अझै पनि अवैध तरिकाले पाउडर दूध आउँदा स्वदेशी दूधको खपत नभएकोले दूधको लागत खर्च घटाउनु पर्नेमा जोड दिए । नेपालमा अन्तराष्ट्रिय मूल्यभन्दा महँगो भएकोले भारतबाट दूध आयात भएको उद्योगीको दाबी थियो । उनीहरुले डेरी उद्योगलाई विद्युत् महसुलमा छुट दिनुपर्ने, दानाको मूल्य नियन्त्रण गर्नुपर्ने, दुग्धजन्य वस्तु आयातमा कर लगाउनु पर्ने र यहाँ उत्पादित दूधजन्य वस्तुमा लगाएको १३ प्रतिशत कर घटाउनु पर्ने विषय उठाएका छन् ।

विराटनगरको कञ्जनगञ्जामा पार्टी प्यालेसमा आयोजित कार्यक्रममा कोशी प्रदेशका मुख्यमन्त्री केदार कार्की प्रमुख अतिथि थिए । कृषि मन्त्रालयको सहयोगमा आयोजित उक्त कार्यक्रमको समय ११ः३० बजेलाई राखिएपनि मुख्यमन्त्री ढिला आएपछि करिब डेढ घण्टापछि पुगेका थिए । त्यसपछि कार्यक्रम उद्घाटन गरेर एउटा कार्यपत्र प्रस्तुत भयो । आयोजकले मुख्यमन्त्रीको कार्यव्यवस्तता रहेको बताउँदै मन्तव्यका लागि बोलाए ।
त्यसपछि ३–४ जना दुग्ध व्यवसायीले मुख्यमन्त्रीले हाम्रो कुरा सुन्नुपर्छ भन्दै हो–हल्ला गरे । मुख्यमन्त्री कार्कीले आफू व्यस्त रहेको र मुख्य समस्या के हो एक दुई जनालाई समस्या सिधै राख्न आग्रह गरे । त्यसबेला मुख्यमन्त्री कार्की आफैं पोडिएममा गएका थिए । ३ जना व्यवसायीले कुरा राखिसकेपछि मुख्यमन्त्रीले मैले कुरा बुझें भनेर रोक्न खोजेपछि होहल्ला बढ्यो । मुख्यमन्त्रीले सबैको कुरा सुन्न पाउने भन्दै नाराबाजी सुरु भयो । त्यसबीचमा मुख्यमन्त्री कार्की र गठबन्धनविरुद्ध मुर्दावादको नारासमेत लाग्यो । त्यसपछि मुख्यमन्त्री कार्यक्रमलाई सम्बोधन नै नगरी बाहिरिएका थिए ।