विराटनगर । कोशी प्रदेश प्रहरी गण रानीमा लेखापालको रुपमा कार्यरत वरिष्ठ सई लक्ष्मण महतरा चोरीको मोटरसाइकल चढेर हिड्ने गरेको पाइएको छ ।

विगत दुई वर्षदेखि १५० सिसिको चोरीको पल्सर मोटरसाइकलमा हिडने गरेको पाइएको हो ।

उनले चोरीको मोटसाइकलमा प्रदेश नं. १–०१–०१३ प ७०२२ राखेर कुदाउने गरेको भन्दै प्रहरी प्रधान कार्यालय साउन २१ गते बेनामे उजुरी दर्ता भएको छ । प्रहरी प्रधान कार्यालयमा दर्ता भएको उजुरीको नम्बर ४५६ रहेको छ ।

उक्त कार्यालयमा जेठ १६ गते वरिष्ठ सइ महतराविरुद्ध उजुरी परेको थियो । महतराविरुद्ध उजुरी परेपछि छानविनको लागि प्रहरी प्रधान कार्यालयले कोशी प्रदेश प्रहरी कार्यालय विराटनगरमा उक्त पत्र पढाएको छ ।

उजुरी उपर छानविन भइरहेको कोशी प्रदेश प्रहरी कार्यालय विराटनगरका प्रवक्ता एसपी ऋषिराम कंडेलले जानकारी दिए । ‘उजुरी दर्ता भएपछि अहिले छानविन भइरहेको छ,’ उनले भने । उजुरीमा परेजस्तो छानविनबाट प्रमाणित भए कारवाहीको भागिदार हुने उनले बताए । ‘प्रहरी संगठनको मुल्य, मान्यता र आचरण विरुद्धको काम गर्ने जोकोही पनि कारवाहीको भागिदार बन्नेछन्,’ एसपी कंडेलले भने ।

सई महतरा यसअघि इलका प्रहरी रानी विराटनगरमा लेखापाल रहेका थिए । उनी सरुवा भएर प्रदेश प्रहरी गणमा पुगेका हुन् । इप्रका रानीमा हुँदादेखि उनी चोरीको मोटसाइकल प्रयोग गर्दै आएको उजुरीमा उल्लेखछ । इप्रका रानीमा लेखापाल रहदा महतराले तस्करीसँग पनि मोटो रकम असुली गर्ने गरेको आरोप लागेको छ । लामो समय रानीमा बस्दा चिनजान भएको तस्करसँग अहिले पनि उनी नियमित सम्र्पक गर्ने र रकम माग्ने गरेको उजुरी पत्रमा आरोप छ ।

उनको प्रहरी वृत्त कीर्तिपुर,काठमाण्डौंमा दरबन्दी भएपनि उनी काजमा प्रदेश प्रहरी कार्यालय गणमा कार्यरत रहेका छन् । कोशी प्रदेशका डिआइजी राजेशनाथ बास्तोलाले केही दिन अगाडि पत्रकार सम्मेलनमा दरबन्दी अनुसाका प्रहरीलाई सोही ठाउँमा पढाउने प्रतिवद्धता गरेपनि महतराको हकमा लागु भएको छैन । उनी शक्ति र पावरको आडमा ‘क’ श्रेणीको ठाउँमा काजमा बस्दै आएका छन् ।