विराटनगर । २०७९ भदौ २९ गते सुनसरीको धरान उपमहानगरपालिका – २० मा एक्लै बस्दै आएकी ६४ वर्षीय पूर्णसरी राईको हत्या भयो । सुनसरी प्रहरीले राईको हत्या आरोपमा असोज ४ गते धनकुटा सागुरीगडी गाउँपालिका ८ घर भई धारनमा बस्दै आएका १८ वर्षीय निखिल भन्ने नकुल राई र भोक्राहा नर्सिङ गाउँपालिका २० वर्षीय रन्जित कुमार साह पक्राउ गरेको थियो । हत्या गरेको पाँच दिन पछि प्रहरीले घटनामा संलग्न आरोपीलाई पक्राउ गरी सार्वजनिक गरेको थियो ।

प्रहरीको अनुसन्धानबाट वृद्धा महिलाले लगाएको सुन लुट्ने नियतले धारिलो हतियार प्रयोग गरी हत्या गरेको अनुसन्धानबाट खुलेको थियो । वृद्धा महिलाको हत्या निखिलले गरेका थिए । निखिल लागू औषध प्रयोगकर्ता थिए । उनीहरु अहिले पुर्पक्षको लागि थुनामा रहेका छन् ।

यसैगरी घरायसी विवादको कारण सुनसरीको इटहरीमा नातामा ज्वाइँ पर्ने ४३ वर्षीय रामकुमार भुजेलले जेठानको हत्या गरे । इटहरी ५ सिमरवनाका ३८ वर्षीय भुवने चौधरीको हत्या आरोपमा भुजेलले इटहरी ६ का २७ वर्षीय वेदप्रकाश मण्डलसँग मिलेर धारिलो हतियार प्रहार गरी असोज २२ गते शनिवार हत्या गरेको सुनसरी प्रहरीको अनुसन्धानबाट खुलेको थियो ।

हत्या आरोपमा सुनसरी प्रहरीले उनीहरुलाई गत असोज २४ गते पक्राउ गरेको थियो । भुजेल र मण्डलले चौधरीको इटहरी ६ नेशनल गल्ली प्रवेश गर्ने स्थानमा धारिलो हतियार प्रहार गरेका थिए । हतियार प्रहारबाट गम्भीर घाइते भएका चौधरीको उपचारको क्रममा धरानस्थित बिपी कोइराला विज्ञान प्रतिष्ठानमा शनिवार मृत्यु भएको थियो ।

यस्तै साउन ५ गते बेलुका ५ः१५ बजेतिर ईटहरी उपमहानगरपालिका २० सेउती पुल नजिकको जंगलमा विराटनगर ५ का २८ वर्षीय रोहित चौधरी र उनीसँगै रहेकी युवतीलाई लुटपाट गरेका थिए । लुटपाट गर्ने क्रममा रोहितले प्रतिकार गरेपछि लुटेरा समूहले उनलाई गोली हानेका थिए । घाइते भएका रोहितको साही दिन बिपी कोइराला विज्ञान प्रतिष्ठान धरानमा मृत्यु भएको थियो ।

प्रहरीले रोहितको हत्या भएको १२ दिनेपछि गिरोहका मुख्य नाइके दिपक तिम्सिनासहित ६ जनालाई पक्राउ गरेको थियो । प्रहरीले लेटाङ नगरपालिका १ घर भएका ३५ वर्षीया दीपक तिम्सिना, धरान १४ का ३४ वर्षीय अनसन तामाङ, विराटनगर १५ का ४१ वर्षीया अजय कुमार शर्मा, भद्रपुर नगरपालिका १ घर भइ धरान उपमहानगरपालिका ८ मा बस्दै आएका प्रकाश लिम्बु र धरानका ३१ वर्षीया सुजन तामाङ्गलाई पक्राउ गरेको थियो ।

पक्राउ परेका अभियुक्तहरुले चारकोसे झाडीमा श्रृंखलाबद्ध लुटपाट गर्ने गिरोह रहेको पनि खुलेको थियो । दिपकसहितको तीन जनाको समूहले २०८० असार ८ गते साँझ साढे ६ बजेतिर सुनसरीको धरान उपमहानगरपालिका १७ खैरेनी जंगलमा लुटपाट भएको थियो । एक जना महिलालाई नडाहबाट धरानतर्फ जाँदै गर्दा ३ जना अज्ञात व्यक्तिहरुले लाठी र खुकुरी देखाई उनले लगाएका १ तोलाको सुनको सिक्री, आधा तोलाको सुनको मंगलसुत्र, आधा तोलाको सुनको टप, ओप्पो मोबाइल, उनले बोकेको ब्याग र ६ हजार ५ सय रुपैयाँ लुटापट भएको थियो । लुटपाट गरेर तीन जना फरार भएका थिए ।

आर्थिक वर्ष ०७९- ०८० मा ५१९ जना फरार प्रतिवादी पक्राउ परेका छन् । उनीहरुबाट १४५ बर्ष ८ महिना २५ दिन कैद भुक्तान भएको छ भने ३० लाख १३ हजार ३८१ रुपैयाँ राजस्व संकलन भएको छ । आर्थिक वर्षमा ४ करोड ५१ लाख ५० हजार ६६८ रुपैयाँ राजस्व संकलन भएको छ ।

उल्लेखित घटना प्रतिनिधि मूलक हुन् । सुनसरी प्रहरी प्रमुख भएर एसपी प्रभु प्रसाद ढकाल एक वर्ष सुनसरीमा उत्कृष्ट काम गर्दै सरुवा भएका छन् । ढकालको राष्ट्रिय प्रहरी प्रशिक्षण प्रतिष्ठान आधारभूत तालिम शाखा महाराजगंजमा नियमित सरुवा भएको हो । उनले कार्यकालमा सुनसरीमा गम्भीर प्रकृतिका अपराध गरी फरार अभियुक्तहरुलाई पक्राउ गरी कानुनी कारवाहीको दायरमा ल्याएका छन् ।
फरार पक्राउ पर्ने अभियुक्त कर्तव्य ज्यान, अपहरण तथा शरीर बन्धक, जबरजस्ती करणी, डाका लगायत मुद्दाका फरार अपराधीलाई पक्राउ गरेको उनले बताए । पक्राउ परेका अभियुक्त घटना घटाएर २४ वर्षसम्म फरार भएका प्रतिवादीलाई सुनसरी प्रहरीले विशेष प्रहरी खटाएर पक्राउ गरेको छ ।
‘ढिलो चाँडो गलत काम गर्नेहरू कानुनी दायरामा आउनपर्छ, त्यसैले पुराना, अधुरा गम्भीर प्रकृतिका अपराधको अनुसन्धान गरी अपराधी पक्राउ गर्छौँ,’ एसपी ढकालले भने, ‘अदालतको फैसला कार्यान्वयनलाई प्राथमिकतामा राखी फरार पक्राउ अभियान सुरु गरिएको हो ।’ अभियानका माध्यमबाट अपराध गरेर जितिदिन लुकीछिपी वसेपनि तोकिएको कैद वा जरिवाना भुक्तान नगरी छुट छैनन् भन्ने सन्देश पनि दिएको एसपी ढकालले बताए । ‘अपराध गरेपछि सजाय भुक्तान नगरी बचेर बस्न सकिँदैन भनेर समाजमा सन्देश दिन र यही सन्देशका माध्यमबाट समाजमा अपराधको न्यूनीकरण पनि गर्नका लागि सचेतना फैलने आसा गरिएको छ,’ एसपी ढकालले भने ।