विराटनगर । कोशी प्रदेशका नवनियुक्त मुख्यमन्त्री उद्धव थापाले संविधानमा व्यवस्था भए अनुसार ३० दिनभित्र विश्वासको मत लिने बताएका छन् । मंगलबार मुख्यमन्त्रीमा नियुक्त भएपछि संचारकर्मीसँग प्रतिक्रिया दिदै सत्तारुढ गठबन्धनमा छलफल गरेर संवैधानिक व्यवस्था अनुसार तोकिएको मितिमा विश्वासको मत लिने बताएका हुन् । उनले सत्ता गठबन्धनसँग प्रदेशसभाको बहुमत संख्या रहेकाले विश्वासको मत पाउने दाबी गरे ।

‘‘संविधानमा व्यवस्था भए अनुसार ३० दिनभित्र लिने हो, हाम्रो सरसल्लाह हुन्छ, छलफल गर्छौं उपयुक्त समय निश्चित गरेर विश्वासको मत लिन्छौं’, उनले भने ।

थापाले मंगलबार नै प्रदेशसभाका ९३ मध्ये ४७ सदस्यको समर्थनसहित मुख्यमन्त्रीमा दाबी पेश गरेका थिए । उनले कांग्रेसका २९, माओवादी केन्द्रका १३, एकीकृत समाजवादीका ४ र जनता समाजवादी पार्टीका १ जना गरी ४७ जनाको समर्थन जुटाएका थिए । त्यसका लागि सभामुख रहेका माओवादी केन्द्रका प्रदेशसभा सदस्य बाबुराम गौतमले मंगलबार नै राजीनामा दिएका थिए । ९३ सदस्यीय प्रदेशसभामा ४७ जनाको समर्थन अनिवार्य चाहिने अवस्थामा सत्तापक्षकै कुनै प्रदेशसभा सदस्यले प्रदेशसभाको अध्यक्षता गर्नुपर्ने अवस्था आएमा मुख्यमन्त्रीले विश्वासको मत लिन नसक्ने आशंका पनि गरिएको छ ।

हाल उपसभामुख एमालेकी सुनिताकुमारी दनुवार रहेकी छन् । उनले राजीनामा दिएमा ज्येष्ठ सदस्यको रुपमा कांग्रेसका गयानन्द मण्डलले सभाको अध्यक्षता गर्नुपर्ने हुन सक्छ । उपसभामुखको राजीनामासम्बन्धी प्रश्नमा मुख्यमन्त्री थापाले भने, ‘आएपछि सोचौला नि, उहाँको राजीनामाको परिकल्पना हामीले गर्ने होइन नि ?’ मुख्यमन्त्री थापाले आफ्नो सरकार ४ वर्षसम्म चल्ने पनि दाबी गरे ।