विराटनगर । विराटनगरका २८ वर्षीय रोहित चौधरीको गोलीहानी हत्या भएको छ । धनकुटाको मुलघाट पुगेर फर्कदै गर्दा सुनसरीको इटहरी– धरान सडक खण्डको सेउती खोला पुलको दक्षिणपट्टी उनको गोली हानी हत्या भएको हो ।

विराटनगर महानगरपालिका– ५ घर भएका उनले शुक्रबार जन्मदिनको दिन बिहान मन्दिर गएर पूजा गरे । परिवारका सदस्यलाई मिठाई बाँडे । बेलुका बर्थ डे मनाउने तयारी थियो । बेलुका फर्कने बताएका उनी विहान करिब साढे ११ बजे साथीसँग घुम्न निस्कीएका थिए ।

रोहित आएपछि बर्थ डे मनाउने भन्दै परिवारका सदस्य कुरेर बसेका थिए । तर उनी घर फर्कन पाएनन् । बर्थ डे मनाउन पर्खिरहेको परिवारमा मृत्युको खबर आइपुग्यो । खबर पाएपछि आफन्त भावविह्वल छन् । आमा अर्थचेत छिन् । शुक्रबार बर्थ डे को दिन साथीसँग घुम्नका लागि मुलघाट पुगेर फर्कदै गर्दा सुनसरीको इटहरी– धरान सडक खण्डको सेउती पुलको दक्षिण तर्फ चौधरीमाथि तीन जनाको समूहले गोली प्रहार गरेको थियो । बेलुका करिब साढे ५ बजे पानी खानका लागि मोटरसाइकल रोकेका बेला उनीमाथि गोली प्रहार भएको थियो । गोली प्रहारबाट गम्भीर घाइते भएका उनको विपि कोइराला स्वास्थ्य विज्ञान प्रतिष्ठान धरानमा उपचारका क्रममा मृत्यु भयो । उनीसँगै घुम्न गएकी साथी सामान्य घाइते छिन् ।

रोहितकी फुपु दिदी शान्ता चौधरीका अनुसार रोहित परिवारका जेठा छोरा हुन् । परिवार पाल्ने जिम्मेवारी उनी र उनको माइलो भाइसँग थियो । कान्छो भाई पढ्दैछन् । उनका अनुसार रोहित जन्मदिनको लड्डु बाडेपछि दिउँसो मोटरसाइकलमा घुम्न निस्कीएका थिए । शुक्रबार बेलुका नोबेलमै काम गर्ने काकाकी छोरी बहिनीलाई रोहितमाथि गोली प्रहार भएको खबर आयो । दाजूमाथि गोली प्रहार भएको खबर बहिनीले घरमा पुर्याइन् । घाइते भएको केही समयपछि मृत्युको खबर आयो ।

खबर पाएपछि बर्थ मनाउन पर्खिएर बसेको परिवारमा बज्रपात परेको छ । उनकी आमा जानुका अर्धचेत अवस्थामा रहेका कारण मृत्युको खबर शनिबार दिउँसो नसुनाइएको दिदी शान्ताले बताइन् ।

उनी घटनाको दोषीलाई प्रहरीले पक्राउ गर्नेमा विश्वस्त छिन् । रोहित पाँच वर्षदेखि नोबेल मेडिकल कलेजमा काम गर्छन् । उनको घर विराटनगर महानगरपालिका– ५ सम्झना चोकमा पर्छ ।
रोहितको हत्याको खबर पाएपछि उनको परिवार र टोल शोकमा डुबेको छ । उनका बुबा काठका मिस्त्री हुन् । उनका हजुरबुबा रामबहादुर चौधरी प्यारालाइसिसका कारण १७ वर्षदेखि ओछ्यान परेका छन् ।

शुक्रबार बेलुका सेउती पुल नजिकै मोटरसाइकल रोकेको अवस्थामा तीन जनाको समूहले उनीमाथी गोली प्रहार गरेको थियो । लुटपाटका लागि आएको समूहले गोली प्रहार गरेको प्रहरीको भनाई छ । लुटपाटपछि हत्यामा संलग्नको खोजी भइरहेको सुनसरी प्रहरी प्रवक्ता डीएसपी राजकुमार राईले बताए ।