मुसहर समुदाय माथिको विभेद अन्त्य गर्न माग - News Birat

मुसहर समुदाय माथिको विभेद अन्त्य गर्न माग

न्यूज विराट

विराटनगर, २४ माघ । जिल्ला भेलाको आयोजना गरी सुनसरीका मुसहर समुदायले आफुहरु माथिको विभेद अन्त्यको माग गरेका छन् । सुनसरीको इनरुवा जिल्ला भेलाको आयोजना गरेको मुसहर समुदायले आफुहरु माथिको असमानताको खाडल पुरिनु पर्ने बताउँदै अधिकार सुनिश्चित हुनु पर्ने माग गरेका हुन् ।

नेपाल राष्ट्रिय मुसहर संघ जिल्ला तदर्थ समिति सुनसरीले आयोजना गरेको भेलालाई केन्द्रिय महासचिव रामेश्वर सदाय सहित जिल्ला अध्यक्ष छुतरु ऋषिमुसहर लगायतका वक्ताले सम्बोधन गरेका थिए ।

वक्ताहरुले राज्यले आफुहरुको जातीको लागि यथेष्ट अधिकारको बन्दोवस्ती मिलाएको बताउने गरेपनि आफुहरुले भने त्यसको अनुभूति गर्न नपाएको गुनासो पोखे । उक्त कार्यक्रमको इनरुवा नगरपालिकाका प्रमुख राजन मेहताले उद्घाटन गरेका थिए ।

कार्यक्रमको प्रमुख अतिथि नगर प्रमुख मेहताले सबै जातजातिको हक र अधिकार प्रत्याभूतिको सवालमा नगरपालिकाको कार्यालय कटिवद्ध रहेको बताए । मेहताले मुसहर समुदायका बालबालिकाको शिक्षामा सहज पहुँच सँगै युवा जनशक्तिलाई स्थानीय स्तरमा रोजगारीको ग्यारेण्टी गर्ने गरी योजना अघि सारिएको जानकारी दिए ।

जिल्ला भेलामा मुसहर समुदायले शिक्षा, स्वास्थ्य सँगै रोजगारीमा समान पहुँचको माग गरेको थियो । कार्यक्रममा विभिन्न जिल्लामा रहेको मुसहर समुदायको समिति आवद्ध अध्यक्ष तथा पदाधिकारीहरुको उपस्थिति रहेको थियो ।

मा प्रकाशित

यसमा तपाईको मत:

© Copyright 2017 - 2021 Newsbirat pvt ltd. All Rights Reserved.

Design / Developed by codebundles