विराटनगर । विराट नर्सिङ होम (विराटनगर अस्पताल) का सुरक्षागार्डले बाहिरका फार्मेशीका कर्मचारीलाई भित्र प्रवेशमा रोक लगाएपछि बाहिरका फार्मेशी आन्दोलनमा उत्रिएका छन् । बिहीबार दिउँसो एवान फार्मेशीका कर्मचारी प्रितम तामाङ्गलाई विराट नर्सिङ होमका सुरक्षा गार्डले हस्पिटल भित्र प्रवेशमा रोक लगाएपछि बाहिरका फार्मेशीहरु आन्दोलनमा उत्रिएका हुन् ।

उनीहरुले फार्मेशी बन्द गरेर आन्दोलनमा उत्रिए । हस्पिटलले सिण्डीकेट कायम गर्न खोजेको भन्दै बाहिरका फार्मेशीहरु एक जुट भएर विरोध गरे । अस्पतालमा भर्ना भएका विरामीले आफुखुसी रुपमा औषधी किन्न पाउनुपर्छ । तर, अस्पताल प्रशासनले भित्रको फार्मेशीमा मात्र औषधी खरिद गरिनुपर्ने नियम बनाएर बाहिरका फार्मेशीका कर्मचारीलाई भित्र प्रवेश गर्न रोक लगाए । त्यसैको विरोधमा हस्पिटल बाहिरका फार्मेशीहरु एक जुट भएर आन्दोलनमा उत्रिएका थिए । उनीहरुले शुक्रबारपनि आन्दोलन गर्ने बताएका छन् ।

नेपाल औषधी व्यवसायी संघ मोरङका उपाध्यक्ष तथा प्रवक्ता देशबन्धु ढकालले सार्वजानिक स्थलमा खोलिएको हस्पिटल भित्र जोसुकै प्रवेश गर्न पाउनुपर्ने बताए । ‘एउटा व्यवसायीलाई पसल गरेकै भरमा हस्पिटल भित्र सुरक्षागार्ड लगाएर प्रवेशमा रोक लगाउनु हुदैन,’ उनले भने, ‘यस्तो घटनाको हामी घोर भत्सना र निन्दा गर्दछौं । ’