विराटनगर । मोरङको थलहास्थित श्री भैरव गणको नेतृत्वमा पाँच दिने हातेमालो कार्यक्रम सम्पन्न भएको छ । स्थानीय जनप्रतिनिधि, सुरक्षाकर्मी साथै विपद व्यवस्थापनसँग सम्बद्ध निकायहरुसँग एक आपसमा जानकारी आदन प्रदान गर्ने उदेश्यले नेपाली सेनाको मोरङ स्थित श्री भैरव गण थलाहामा हातेमालो कार्यक्रम सम्पन्न भएको हो ।

असार ५ गतेदेखि ९ गतेसम्म पाँच दिने अभ्यास हातेमालो कार्यक्रम नेपाली सेनाले प्रत्येक वर्ष संचालन गर्दै आइरहेको श्री भैरव गणाका गणपति प्रमुख सेनानी अमृत थापा मगरले जानकारी दिए । उनका अनुसार यो कार्यक्रमले निरन्तरता पाएको पाँच वर्ष पूरा भएको छ ।

हातेमालो कार्यक्रम जेठ ७ र ८ गते नेपाली सेनाको जंगी अड्डामा संचालन भएको र असार २८ र २७ गते प्रदेश स्तरीय अभ्यास हातेमालो सुनसरी स्थित नेपाली सेनाको पूर्वी पृतना हेड्क्वाटरमा संचालन भएको प्रमुख सेनानी थापाले जानकारी दिए । सहभागी सम्पुर्ण सरोकारवाला निकायहरुलाई अभ्यास सम्बन्धि जानकारी, सरोकारवाला निकायबाट आ–आफ्नो कार्यालयको काम जिम्मेवारी साथै तयारीको बारेमा प्रस्तुतिकरण गरिएको थियो ।

प्रमुख सेनानी थापाले विपद्को काल्पनिक परिस्थितिको परिकल्पनामा आधारित कथामा सहभागिताहरुलाई प्रदेश, जिल्ला स्थानीय आपतकालीन सञ्चालन केन्द्र लगायतका समूहमा विभाजन गरेर विपतका परिस्थितिमा कसरी काम गर्न सकिन्छ भनेर छलफल गरिएको थियो ।

कटहरी गाउपालिका प्रमुख देवराज चौधरीले हातेमालो कार्यक्रमले विपतमा सुरक्षाकर्मी, संचारकर्मी रेड्क्रस जनप्रतिनिधीहरुको सहकार्य महत्वपूर्ण रहेको बताए । मोरङका प्रमुख जिल्ला अधिकारी बिरेन्द्रकुमार यादवले विपतको समयमा सबैकाई कर्तव्य थाहा हुँदाहुँदै पनि हातेमालो कार्यक्रमले थप महसुस गराउने काम गराएको बताए ।