विराटनगर । देशको दिगो विकासका लागि नीजि क्षेत्रको सहभागिता अपरिहार्य रहेको एक कार्यक्रममा सहभागिहरूले बताएका छन् ।
नेपाल उद्योग वाणिज्य महासंघको आयोजना, नेपाल उद्योग वाणिज्य महासंघ प्रदेश नं. १ को संयोजन तथा यु.एन.डि.पि.को सहयोगमा विराटनगरमा मंगलबार एक दिने प्रदेश स्तरीय व्यवसाय र मानवअधिकार सम्बन्धी रराष्ट्रिय कार्यशाला गोष्ठीमा सहभागिहरूले यस्तो बताएका हुन् ।

कार्यक्रममा बोल्दै नेपाल उद्योग वाणिज्य महासंघ प्रदेश नं. १ का उपाध्यक्ष एंव केन्द्रिय सदस्य राजेन्द्र राउतले देशको दिगो विकासका लागि नीजि क्षेत्रको सहभागिता अपरिहार्य रहेको बताए । उनले देशमा सबैभन्दा धेरै रोजगारी सुनिश्चीत गर्ने क्षेत्र पनि निजी क्षेत्र भएको बताए । व्यवसाय तथा मानवअधिकार सम्बन्धी राष्ट्रिय कार्य योजना प्रारम्भीक मस्यौदामा रहेका विभिन्न महत्तवपूर्ण पक्षहरुका बारेमा नीजि क्षेत्र, महासंघका सदस्यहरु तथा व्यवसायसंघ सरोकारवालाहरुलाई जानकारी दिन यो गोष्ठीको आयोजना गरिएको उनले बताए ।

यूएनडीपी परियोजना संयोजक प्रकाश बुढामगरले व्यवसाय र मानवअधिकार विषयमा आफ्नो कार्यपत्र प्रस्तुत गरेका थिए । विज्ञ सन्तोष सिग्देलले व्यवसाय र मानवअधिकार शीर्षकमा नेपालमा देखिएको विषयवस्तुको उठान गरेका थिए ।
कार्यक्रममा राष्ट्रिय कन्सल्टेन्ट रामचरित्र साहले प्रारम्भिक मसौदाको कार्यपत्र प्रस्तुत गरेका थिए । कार्यक्रममा श्रमिकको अधिकार, उपभोक्ता अधिकार, महिला तथा बालबालिका अधिकार, आप्रवासी कामदार सम्बन्धी अधिकार, लैङ्गिक समानता र अविदेनको अधिकार विषयमा समूहगत छलफलका गरिएको थियो । समूहगत छलफलमा उठेका विषयहरु लाई उद्योग वाणिज्य महासंघबाट आएका विज्ञ मोदनाथ ढकालले सम्बोधन गरेका थिए ।

नेपाल उद्योग वाणिज्य महासंघ केन्द्रीय सदस्य उमेश डालमियाले मानवअधिकारका विषयलाई निजी क्षेत्रले लागू गर्दै आइरहेको बताउदै यसप्रकारको कार्यक्रमले भविष्यमा उद्योग व्यवसायलाई थप सहयोग पुग्ने उल्लेख गरे ।
कार्यक्रमको शुरुवातमा कार्यक्रम संचालिका एंव नेपाल उद्योग वाणिज्य महासंघकी सहनिर्देशक सीता घिमिरेले कार्यक्रमका बारेमा प्रकाश पारे ।
नेपाल उद्योग वाणिज्य महासंघ प्रदेश नं. १ का उपाध्यक्ष एंव केन्दीय सदस्य राजेन्द्र राउतको अध्यक्षतामा भएको उक्त कार्यक्रममा प्रदेश नम्बर १ जिल्ला नगर उद्योग वाणिज्य संघ, वस्तुगत संघ तथा उद्योगीव्यवसायीहरु सहित करीब ६० जनाको सहभागिता रहेको नेपाल उद्योग वाणिज्य महासंघ प्रदेश १ का कार्यकारी निर्देशक राधारमण भण्डारी (श्याम) ले जानकारी दिए ।