विराटनगर । खुल्ला सीमाको फाइदा उठाउँदै भारतबाट अवैध रूपमा हुने चोरी तस्करीलाई निस्तेज बनाउने अभियान सुरु गरेको मोरङ प्रहरीले भन्सार छली गरेर आउने सामग्रीहरू धमाधम बरामद गर्न थालेको छ । चोरी तस्करी भएर आएको समान बरामद गर्न प्रहरी सक्रिय रूपमा लागि परेको छ ।

इलाका प्रहरी कार्यालय रानी विराटनगरले सात दिनको फरकमा ठुलो परिमाणको अवैध रूपमा भन्सार छली गरेर ल्याएको सामाग्री बरामद गरेको छ । इप्रका रानीका प्रहरी निरीक्षक महेन्द्र दर्नालको नेतृत्वमा आइतबार विराटनगर १६ हुलास चौक, १७ रघु पती जुट मिल छेउ र जहादा गाउँपालिका १ नहर टोल बाट अवैध रूपमा भन्सार छली गरेर ल्याएको ७ लाख ४६ हजार ९२८ रुपैयाँको समान बरामद गरेको छ । प्रहरीले भिटामिन, लत्ताकपडालगायतका विभिन्न अवैध सामाग्री बरामद गरेको हो ।

यसै गरी ७ दिन अगाडी ३ पुसमा १२ लाख ३ हजार ४२० मूल्य बरावरको सामान नियन्त्रणमा लिएको थियो । प्रहरीले त्यस बेलामा आँखामा लगाउने लेन्स र औषधी बरामद गरेको प्रहरीले जनाएको छ ।
बरामद गरिएको सामान प्रहरीले आवश्यक अनुसन्धान र कारबाहीका लागि विराटनगर भन्सार कार्यालयमा बुझाएको छ।
चोरी तस्करी नियन्त्रणका लागि नेपाल–भारत सीमा क्षेत्रमा उच्च सतर्कता अपनाइएको मोरङ प्रहरी प्रमुख एसपी शान्तिराज कोइरालाले बताए। उनका अनुसार चोरी तस्करीलगायतका अवैध धन्दा नियन्त्रणलाई प्राथमिकतामा राखेर सीमा क्षेत्रमा निगरानी बढाइएको छ।