नेकपा एमालेले पार्टीको अर्थ तथा योजना विभागको सदस्य रहेका एम अधिकारी नाम गरिएका व्यक्ति नेपाल राष्ट्र बैंकका गभर्नर महाप्रसाद अधिकारी नभएको जनाएको छ ।

एमालेको प्रचार विभागमा एम अधिकारी पनि सदस्य भएपछि ती व्यक्ति गभर्नर अधिकारी नै भएको भन्दै सामाजिक सञ्जालदेखि संसदसम्म विरोध भएको थियो । त्यसयता यो विषय विवादित बन्दै आएको छ ।

गभर्नर अधिकारीले लेखेको पत्रको जवाफ दिँदै एमालेका केन्द्रीय कार्यालय सचिव डा. भिष्म अधिकारीले एम अधिकारी नै गभर्नर महाप्रसाद भनी भ्रम सिर्जना भएकोमा ध्यानाकर्षण भएको जनाएका छन् ।

एमालेले पार्टीका कमिटी र विभागहरूमा सार्वजनिक पद धारण गरेका व्यक्तिहरू रहने व्यवस्था नभएको पनि दाबी गरेको छ ।

यसअघि गभर्नर अधिकारीले आफू कुनै पनि राजनीतिक दलमा आबद्ध नभएको भन्दै एम अधिकारीका बारेमा स्पष्ट पारेर त्यसको जानकारी आफूलाई पनि दिन आग्रह गर्दै एमालेलाई पत्र लेखेका थिए ।