विराटनगर, २८ असार । प्रदेश नं १ का कृषि मन्त्री झलकबहादुर मगरले पर्यावरण असन्तुलनले मानव स्वास्थ्यमा धेरै असर परिरहेको बताउनुभएको छ । पशुपंक्षी तथा मत्स्य विकास निर्देशनालयद्वारा आज यहाँ आयोजित एक स्वास्थ्य रणनीति कार्यान्वयनका लागि प्राथमिकता प्राप्त जुनोटिक रोगहरुको न्यूनीकरण सम्बन्धी सरोकारवालहरुसँग छलफल कार्यक्रमको उद्घाटन गर्दै उहाँले सो कुरा बताउनुभएको हो ।

मन्त्री मगरले मानव स्वास्थ्यसँगै पशु पंक्षीको स्वास्थ्य पनि राम्रो हुनु पर्ने भन्दै दुबैको स्वास्थ्यका लागि एकीकृत ढङ्गले अघि बढ्नु पर्ने विचार राख्नुभयो । मन्त्री मगरले कुनै एक अस्वस्थाले अर्को पनि प्रभावित हुने भएकाले यसको रोकथाम, नियन्त्रण गर्न एकीकृत भएर लाग्नु पर्ने र यसकालागि मन्त्रालयबाट हुने सहयोगको प्रतिवद्धता व्यक्त्त गर्नुभयो ।

कृषि मन्त्रालयका सचिव मेघनाथ तिमल्सेनाले पशु र मानव स्वस्थ भएमा यसबाट राज्यले पनि अत्यधिक लाभ लिने धारणा राख्नुभयो । स्वास्थ्य निर्देशनालयका निर्देशक डा ज्ञानेन्द्रबहादुर बस्नेत र पशुपंक्षी तथा मत्स्य निर्देशनालयका निर्देशक डा पशुपति ढुङ्गाना र नेपाल लाईभ स्टक सेन्टर इनोभेसन आयोजना विकेन्द्रीत आयोजना सहयोग इकाई विराटनगरका संयोजक डा सुधीर सिंहले सरकारले प्राथमिकतामा राखेका १० रोग मध्ये कुनै एक रोगलाई केन्द्रित गरेर कार्यक्रम सञ्चालन गर्नु पर्ने सुझाव दिनुभयो ।

कार्यक्रममा कृषि सचिव मेघनाथ तिमल्सेना, प्रदेश जनस्वास्थ्य प्रयोगशालाका निर्देशक डा जयेन्द्र यादव, पुश तर्फका डा सञ्जयकुमार यादवले पनि एक स्वास्थ्य रणनीतिका बारेमा कार्यपत्र प्रस्तुत गर्नुभएको थियो ।