भारतीय प्रहरीको एक विशेष टोली नेपाल आएको छ । पञ्जाबका गायक सिद्धु मुसेवालाका हत्यारा खोज्न दिल्ली प्रहरीको विशेष टोली नेपाल प्रवेश गरेको भारतीय सञ्चारमाध्यम इन्डिया टुडेले लेखेको छ ।

आइतबार मुसेवालाको हत्या भएको थियो । उनका हत्यारा नेपाल पसेको सूचनाका आधारमा भारतीय प्रहरी नेपाल आइपुगेको इन्डिया टुडेले लेखेको छ ।

मुसेवालाका हत्यारालाई पक्राउ गर्न भन्दै दिल्ली प्रहरीको विशेष टोली शुक्रबार नेपाल आइपुगेको हो । पञ्जाबका चर्चित गायक मुसेवालामाथि तीन दर्जनभन्दा बढी गोली प्रहार गरिएको थियो । पञ्जाबको राजनीतिमा समेत सक्रिय रहेका मुसेवालाको हत्याका मुख्य योजनाकार भने क्यानडामा छन् ।

क्यानडामा रहेर भारतमा गुण्डागर्दी मच्चाउने गोल्डी ब्रारले मुसेवालालाई आफ्ना मान्छेले मारेको दाबी गरेका छन् । तर, गोली चलाउने हत्यारा भने नेपाल फरार भएको सूचना पाएपछि भारतीय प्रहरीको विशेष टोली नेपाल छिरेको छ ।

प्रहरी उच्च स्रोतका अनुसार मुसेवालाका हत्यारा नेपाल छिरेको आशंका भएपछि नेपालमा सुरक्षा निगरानी भने बढाइएको छ ।