काठमाडौं, कात्तिक २८ । नेपाल रेडक्रस सोसाईटीको विशेष विधान महाधिवेशन स्थगित भएको छ । थापाथलीस्थित कार्की ब्याङ्केटमा आयोजित विशेष महाधिवेशनमा असन्तुष्ट समूहले तोडफोड गरेपछि स्थगित भएको हो । विधान विपरीत कारबाही गरेका १६ जिल्लाबाट आएका गैरप्रतिनिधिले सभास्थलमा तोडफोड गरेको रेडक्रस सोसाईटीका अध्यक्ष नेत्रप्रसाद तिम्सिनाले बताउनु भयो ।

अध्यक्ष तिम्सिनाका अनुसार रेडक्रसले कारबाही गरेका १६ जिल्ला समितिबाट आएकाहरुले सभास्थल बिथोलेका थिए । रेडक्रसको विधि र विधान विपरीत काम गरेका,वैधानिक दायित्व पूरा नगरेका ती जिल्ला समितिहरु भंग गरेर विधान बमोजिम केन्द्रीय समितिले तदर्थ समिति गठन गरिदिएको थियो । सुनसरी, मोरङ,सिराहा, रौतहट, पर्सा, काठमाडौं, गोरखा, रोल्पा, जाजरकोट, रूकुम पश्चिम, हुम्ला, चितवन, बागलुङ, मकवानपुरलगायतका जिल्ला समितिहरुले काम नगरेपछि नयाँ तदर्थ समिति गठन भएको थियो । तीनै जिल्लाबाट आएकाहरुले सभा बिथोलेको अध्यक्ष तिम्सिनाले बताउनु भयो ।

आइतबार रेडक्रसले संघीयता अनुकूल हुने गरी विधान संशोधन गर्नका लागि महाधिवेशन गर्न लागेको थियो । ‘संघीयता अनुकूल बनाऔं भनेर हामीले विधान महाधिवेशन गर्न लागेका थियौं,’ अध्यक्ष तिम्सिनाले भन्नुभयो, पालिका तहमा हाम्रो संस्थाको राम्रो उपस्थिति थिएन । विधान संशोधन गरेर पालिका स्तरसम्मै रेडक्रसको सञ्जाल फैलाउने उद्देश्य अनुरुप विधान संशोधन गर्न लागेका थियौं । १६ जिल्लाबाट आएकाहरुले बिथोलिदिए ।’ सभास्थल बिथोलेको आरोपमा प्रहरीले ६ जनालाई पक्राउ गरेको छ । तोडफोडमा संलग्न सवै नेपाली कांग्रेसमा आवद्ध नेता कार्यकर्ता रहेको एक सदस्यले बताए ।