विराटनगर, १५ असोज । सामाजिक कार्यमा अग्रसर रोटरी क्लब अफ विराटनगर डाउन टाउनले विश्व मुटुरोग दिवसको अवसर पारेर प्रौढलाई सहयोग कार्यक्रम सञ्चालन गरेको छ ।

रोटरी क्लब अफ विराटनगर डाउन टाउनले रोट्राक्ट क्लब अफ नोबेल मेडिकल कलेज एण्ड टिचिङ हस्पिटलसँगको सहकार्यमा दिवसको अवसर पारेर प्रौढलाई सहयोग कार्यक्रम सञ्चालन गरेको हो । दिवसको अवसरमा विराटनगर—८ अशोक चोकस्थित विराटेश्वर बृद्धाश्रममा आश्रित बृद्धबृद्धाहरुको स्वास्थ्य जाँच गरिएको छ ।

स्वास्थ्य जाँच शिविरमा बद्धबृद्धाको रक्तचाप, आँखा मधुमेह, मुटुलगायत निशुल्क परिक्षण गरिएको थियो । चिकित्सकले इसीजी गरेर बृद्धबृद्धाको मुटु ठिक रहेको वा नरहेको जाँच गरेका थिए ।

कार्यक्रममा नोबेल मेडिकल कलेजका वरिष्ठ छाती तथा फोक्सो रोग विशेषज्ञ डा. फरमुद अन्सारी, डा. संजय मण्डल, डा. श्रीप्रसाद साह र डा. सनेश साहको सहभागिता रहेको थियो ।

स्वास्थ्य जाँचबाट आश्रममा आश्रित ५५ जना बृद्धबृद्धा लाभान्वित भएको रोटरी क्लब अफ विराटनगर डाउन टाउनकी अध्यक्ष संचिता जैनले जानकारी दिइन् । सो अवसरमा आश्रममा आश्रित जेष्ठ नागरिकहरुलाई फलफूल तथा जुस समेत वितरण गरिएको क्लकी महासचिव अनिता सारडाले बताइन् । स्वास्थ्य जाँच र फलफूल वितरुणबाट बृद्धबृद्धाले खुशि व्यक्त गरेका थिए ।

प्रौढलाई सहयोग कार्यक्रम रोटरी क्लब अफ विराटनगर डाउन टाउनकी अध्यक्ष संचिता जैन, महासचिव अनिता सारडा र जनसम्वर्प अधिकारी मञ्जु अग्रवालको सकृयतामा सञ्चालन गरिएको हो ।

रोटरी क्लब अफ विराटनगर डाउन टाउनले कोरोना माहमारीको समयमा संक्रमणको जोखिमलाई पनि बेवास्ता गर्दै सामाजिक कार्यहरु गर्दै आएको छ । क्लबले कोरोना माहमारीको जोखिममा पनि सामाजिक कार्यलाई निरन्तरता दिँदै आएको छ ।

केही दिन अघि मात्र क्लबले हामी युवा नामक सामाजिक संस्थालाई २५० भन्दा बढी बहुउपयोगी पुस्तकहरु समेत हस्तान्तरण गरेको थियो । रोटरी क्लब अफ विराटनगर डाउन टाउनले नियमितरुपमा सामाजिक कार्यहरु गरिरहेको छ ।