काठमाडौं, ३ असोज । संविधान दिवसका दिन सरकारले कोभिड–१९ का कारण ज्यान गुमाएका डीएसपीद्वय राजकुमार केसी र समीरचन्द्र खरेललाई वीरता पदक दिने घोषणा गरिएको छ ।

केसी र खरेलले गत जेठमा कोरोना संक्रमणका कारण नेपाल प्रहरी अस्पतालमा ज्यान गुमाएका थिए । कोभिड नियन्त्रणमा खटिएकै बेला उनीहरू संक्रमित हुन पुगेका थिए ।

केसी काठमाडौं प्रहरी परिसरमा कार्यरत थिए भने खरेल प्रहरी तालिम केन्द्र महाराजगञ्जमा कार्यरत थिए । उनीहरूबाहेक सरकारले प्रहरीका १ सय १९ जनालाई विभिन्न पदकद्वारा विभूषित गर्ने भएको छ ।

मन्त्रिपरिषद्को सिफारिसमा राष्ट्रपति विद्यादेवी भण्डारीले संविधान दिवसको अवसरमा पदकको घोषणा गरेकी हुन् ।  पदकद्वारा सम्मान गर्ने घोषणा गरिएकामा प्रहरी कार्यालय सहयोगीदेखि महानिरीक्षक आईजीपीसम्म छन् । कार्यालय सहयोगी सूर्यकुमारी अधिकारीले राष्ट्रसेवा पदक प्रथम श्रेणी पाउने भएकी छिन् ।

अधिकारी महानगरीय प्रहरी पहरा गण गुल्म नम्बर–४ सामाखुसीमा कार्यरत छिन् । नेपाल प्रहरीका आईजीपी शैलेश थापा क्षेत्रीलाई सुकीर्तिमय राष्ट्रदीप प्रदान गर्ने घोषणा गरिएको छ ।