भारतमा लुकेर वीरगञ्जलगायत सीमावर्ती शहरमा आपराधिक गतिविधि गर्दै आएकाे समूहका मुख्य नाइके ३३ वर्षीय फुलहसन अन्सारी उर्फ विवेक सिंह पक्राउ परेका छन् । वीरगञ्ज- २४, रामगढवाका अन्सारी २४ साउन २०७६ मा वीरगञ्जकाे बिर्ताबजार र  त्यसको चार दिनपछि २८ साउनमा घण्टाघरनजिकै मिना बजारमा भएकाे बम विस्फाेटकाे मुख्य याेजनाकार पनि हुन् । त्याे बेला घटनामा संलग्न इनुस अन्सारी, जौवाद अन्सारी र सद्दाम अन्सारीलाई प्रहरीले पक्राउ गरे पनि विवेक सिंह भने भाग्न सफल भएका थिए ।

पाण्डेका अनुसार यसअघि ७ पुस २०६५ मा वीरगञ्ज आदर्शनगरका उद्योगी राजेश क्याललाई गोली हानी हत्या गरेको अभियोगमा पनि अन्सारी हतियारसहित समातिएका थिए । उक्त मुद्दामा अदालतले उनलाई सर्वस्वसहित जन्मकैदको फैसला सुनाएकाे थियाे ।  तर, ८ असाेज २०७४ मा दसैँकाे अवसरमा सरकारले ५६ प्रतिशत बाँकी कैद मिनाहा गरेपछि उनी छुटेका थिए ।

त्यसपछि उनले भारतमा आपराधिक समूह बनाएर सीमावर्ती शहरका उद्योगी, व्यवसायीलाई फोनमार्फत धम्की दिई रकमसमेत असुल्दै आएका थिए । भारतको मुजफ्फरपुरमा आफ्नो पहिचान ढाँटेर अंकित पटेलको नामबाट भारतीय आधार कार्ड बनाई उतै बस्दै आएका अन्सारीलाई हिजाे बिहान वीरगञ्जस्थित घर आउने क्रममा पक्राउ गरिएकाे पर्साका प्रहरी उपरीक्षक बेलबहादुर पाण्डेले बताए । अन्सारीविरुद्ध विस्फोटक पदार्थ खरखजानासम्बन्धी कसुर तथा संगठित अपराधमा मुद्दा चलाइने पाण्डेले बताए ।