कांग्रेस केन्द्रीय सदस्य एवं सांसद अमरेशकुमार सिंहलाई कारबाहीकाे माग गर्दै उनकाे गृह जिल्ला सर्लाहीका १२ जना कांग्रेसीले प्रधानमन्त्रीसमेत रहेका सभापति शेरबहादुर देउवालाई पत्र पठाएका छन् । सर्लाहीका प्रदेश सांसद वीरेन्द्रप्रसाद सिंह, उपेन्द्रप्रसाद कुशवाहालगायतका नेताले हिजाे बिहीबार पत्र पठाएका हुन् ।

महाधिवेशन आइसक्दा पनि जिल्लामा नआएका तर यहाँ गरिएको निर्णय नमानी हिँड्ने सांसद सिंहकाे शैलीले आफूहरू आजित भएको उनीहरूले पत्रमा लेखेका छन् । सिंहको पार्टीविरोधी गतिविधिले जिल्लामा चिन्ताजनक स्थिति उत्पन्न गराएको उनीहरूकाे भनाइ छ ।

पटकपटक संसदीय कोषमा आउने पैसा दुरुपयोग गरेको र आपतकालीन स्थितिमा पनि जिल्ला नआएको भन्दै उनीहरूले आक्रोश पाेखेका छन् ।

सिंहले अधिनायकवादी शैली देखाएकाे आराेप पत्रमा लगाइएकाे छ । त्यसैले विधानबमोजिम कारबाही गर्न उनीहरूले माग गरेका छन् । अन्यथा आफूहरू नै राजीनामा दिन बाध्य हुने चेतावनी १२ नेताले दिएका छन् ।

‘पार्टी विरोधी र पार्टी संगठनलाई कमजोर गर्ने कार्यमा संलग्न अमरेशकुमार सिंहलाई कारबाही नभए हामी नै राजीनामा दिन बाध्य हुने जानकारी गराउँछौँ’, उनीहरूले देउवालाई पठाएको पत्रमा उल्लेख छ ।