उपप्रधानमन्त्री ईश्वर पोखरेलले सरकारले आवश्यक परे स्वास्थ्य संकटकाल लगाएर भए पनि कोभिड महामारी नियन्त्रण गर्ने बताएका छन् । त्यसका लागि कोभिड १९ संकट व्यवस्थापन अध्यादेशमार्फत कानूनी व्यवस्था गरिएको उनले जनाए ।

‘गतवर्ष कोभिड नियन्त्रणमा आएको ठानेर लापरबाही गर्दा अहिलेको स्थिति आयो’ उनले सिंहदरबारमा बुधवार संचारकर्मीहरुसँग भने, ‘कोभिड संक्रमण समुदायमा फैलिइसकेको छ । जुनसुकै बेला स्वास्थ्य संकटकाल लगाएर नियन्त्रण गर्नुपर्ने हुनसक्छ । सरकारले त्यसका लागि आवश्यक तयारी गरेको छ ।’

पहिलो लहरको तुलनामा नयाँ भेरियन्टको दोस्रो लहर धेरै घातक देखिएको छ । बैशाखका दुई साता देशभरका अस्पताल भरिभराऊ हुनेगरी संक्रमित बढे । त्यतिबेला स्वास्थ्यविद् र स्वयं स्वास्थ्य मन्त्रालयले समेत स्वास्थ्य संकटकाल लगाउन आग्रह गरेका थिए । मन्त्रिपरिषद्ले तत्काल स्वास्थ्य संकटकाल लगाउनु नपर्नेभन्दै ती प्रस्तावहरु पन्छाएको थियो ।

तर, प्रधानमन्त्री केपी ओलीले दोस्रोपटक संसद विघटन गरेपछि सरकारबिरुद्ध विपक्षी गठबन्धन आन्दोलनको तयारीमा छ । यस्तो बेला सरकारले स्वास्थ्य संकटकालको तयारी गर्नुलाई राजनीतिक दबाब थेग्ने रणनीतिका रुपमा आलोचना गर्न थालिएको छ । उपप्रधानमन्त्री पोखरेलले भने ती आशंकाको खण्डन गर्दै भने, ‘अहिल्यै स्वास्थ्य संकटकाल लगाई हाल्ने भनिएको हैन । जुनसुकै बेला आवश्यक पर्नसक्छ, सरकार तयारी अवस्थामा छ भनिएको हो ।’

स्वास्थ्य संकटकालको सम्भावना औल्याउँदै उनले समुदायस्तरमा संक्रमण फैलिएकाले व्यापक परिक्षण गरेपछि धेरै कुरा थाह हुने बताए । ‘अहिले धेरै परिक्षण भएकै छैन । परिक्षणमा धेरै संक्रमित देखिए भने त्यो (संकटकाल) को स्थिति आउनसक्छ । तेस्रो लहर झन् धेरै खतरनाक हुने विज्ञहरुले बताइरहेका छन्’ उनले भने ।

उपप्रधानमन्त्री पोखरेलले चुनावअघि नै सबै नागरिकलाई खोप लगाउने गरी सरकारले आफ्नो सम्पूर्ण ध्यान कोभिड–१९ विरुद्धको अभियानमा केन्द्रित गर्ने बताएका छन्।

कोभिड संक्रमितको उपचार र खोप व्यवस्थापनमा सरकारको अर्जुनदृष्टि रहेको उनले बताए । ‘सरकारको एक मात्र ध्यान भ्याक्सिन ल्याउनुमा छ । जतिसक्दो छिटो जनतालाई खोप लगाउनमा अर्जुनदृष्टि लगाएर काम गरिरहेको छ’ उप प्रधानमन्त्री पोखरेलले सञ्चारकर्मीहरुसँग भने, ‘चुनावअघि नै सबै नागरिकलाई खोप लगाउनेगरी तयारी गरिरहेका छौ ।’

सरकारले शनिबार ल्याउने आर्थिक बर्ष २०७८/०७९ को बजेट पनि कोभिड १९ को नियन्त्रण, खोप व्यवस्थापन र स्वास्थ्य क्षेत्रमा दीर्घकालीन पूर्वाधार निर्माणमा केन्द्रीत रहने उनले जनाएका छन् ।

खोप सहायता तथा खरिदका लागि छिमेकी मुलुकहरु भारत, चीनसहित अमेरिका, बेलायत र युरोपेली मुलुकहरुसँग बिभिन्न तहमा संवाद भइरहेको उनले बताए । त्यसबाहेक चुनावअघिसम्म खोप लगाइसक्ने बताए पनि त्यसको ठोस आधार भने उनले बताउन सकेनन् । खोप ल्याएर लगाउन निजी क्षेत्रलाईसमेत स्वीकृति दिइएको छ । सरकारले हालसम्म महामारीको अग्रपंक्तिमा रहेका उच्च जोखिमका स्वास्थ्यकर्मी, सुरक्षाकर्मी, सरसफाईकर्मी, पत्रकार, शिक्षक र जेष्ठ नागरिकलाई समूहगत रुपमा कोभिड खोप लगाएको छ।