विराटनगर, ११ जेठ । नेपाल उद्योग परिसंघ प्रदेश नम्बर १ प्रदेश समितिको समन्वय र एशियन थाइफुड्सको सौजन्यमा सुनसरी–मोरङ औद्योगिक क्षेत्रका श्रमिक परिवारलाई राहत हस्तान्तरण गरिएको छ । कोरोनाको जोखिम न्यूनीकरण र रोकथामका लागि सरकारले जारी गरेको निषेधाज्ञाका कारण काम गर्न नपाउँदा समस्यामा परेका श्रमिकहरुलाई राहत वितरण गरिएको हो ।

एसियन थाई फूड्सको सहयोगमा नेपाल उद्योग परिसंघ प्रदेश नम्बर १ ले औद्योगिक क्षेत्रअन्तर्गत दुहबीका अति विपन्न श्रमिक परिवारलाई २५ लाख मूल्य बराबारको राहत सामग्री मंगलबार हस्तान्तरण गरिएको छ । सो क्षेत्रका विभिन्न उद्योगमा कार्यरत २ हजार श्रमिक परिवारलाई राहत वितरण गरिएको थियो ।

चामल, दाल, नुन, खाने तेललगायतका खाद्यन्न सामग्री प्रदान गरिएको परिसंघले जनाएको छ । दुहवी नगरपालिकाका २, ८, ९, १० र ११ वडा नम्बरका वडाध्यक्षहरुलाई प्रत्येक वडाका चार सयजनालाई एक साता पुग्ने सामग्री हस्तान्तरण गरिएको हो ।

एशियन थाइफुड्सको प्राङ्गणमा भएको कार्यक्रमलाई सम्बोधन गर्दै नेपाल उद्योग परिसंघका अध्यक्ष भीम घिमिरेले लकडाउनले उद्योगहरुको उत्पादन कटौति भएको र कतिपय उद्योगहरु बन्द भएकाले विहान–बेलुका छाक टार्न समस्या भएका मजदुरहरुलाई एक सातासम्म पुग्ने खाद्यान्न वितरण गरिएको बताए ।

उनले अति विपन्नहरुको पहिचान गरेर राहत स्वरुप खाद्यन्न अझै सहयोग गर्ने प्रतिबद्धता जनाए । राज्यले नसोचेको बेला एशियन थाई फूड्सको सहयोगमा परिसंघले अति विपन्नहरुको पहिचान गरेर राहत वितरण गरेको अध्यक्ष घिमिरेले बताए ।

दुहबी वडा नम्बर ९ का अध्यक्ष मेहदी हुसैनले आयोजकहरुलाई धन्यवाद दिदै विपन्न परिवारलाई इमान्दारीताका साथ राहत सामाग्री वितरण गरिने बताए । उनले अहिलेसम्म संघीय र प्रदेश सरकारले विपन्न परिवारलाई राहत दिने विषयमा केही नसोचेको गुनोसो व्यक्त गरे ।

लकडाउनका कारणले दैनिक ज्याला मजदुरी गर्न नपाउँदा विपन्न परिवारलाई बिहान बेलुका हातमुख जोड्न समस्या भएको बेला अति एशियन थाइ फूड्स प्रा.लि. सुनसरीले सहयोग जुटाइदिएको एशियन थाइ फूड्स प्रालिका प्रबन्धक समिर साह र परिसंघका उपाध्यक्ष दिपक पौडेलको भनाइ छ ।

एक पोका राहत सामग्रीभित्र ५ केजी चामल, एक केजी दाल, एक लिटर खानेतेल, एक केजी नून, ५ प्याकेट चाउचाउ, एक पोका विस्कुट, भटमासको मस्यौरा र १० थान मास्क रहेको छ । दुवही नगरपालिकाका ५ वटा वडामा ४०० सय परिवारको दरले वितरण गरिने जनाइएको छ ।