विराटानगर, ९ जेठ । प्रदेश १ को प्रमुख प्रतिपक्षी दल नेपाली कांग्रेसले प्रदेश सरकारले खोपको दुरुपयोग गरेको आरोप लगाएको छ । नेपाली कांग्रेस प्रदेश १ का प्रमुख सचेतक केदार कार्कीले प्रदेशमा भण्डारण गरिएको कोरोनाविरुद्धको खोपको दुरुपयोग भइरहेको आरोप लगाएका हुन् ।

आइतबार विज्ञप्ती जारी गर्दै कार्कीले खोप अभियानलाई प्राथमिकता दिनुको साटो भनसुनका आधारमा पहुँचभएकाहरूलाई मात्रै लगाएर अनाधिकृत रूपमा खोपको दुरुपयोग हुनु दुर्भाग्यपूर्ण भएको बताएका छन् ।

कोभिड–१९ विरुद्धको खोप अभियानलाई प्राथमिकता दिनुको साटो प्रदेशमा मुख्यन्त्री, मन्त्री र माथिल्लो दर्जाका कर्मचारीले भनसुनका भरमा आफ्ना निकटका मानिसहरूलाई मात्रै खोप लगाउने काम भइरहेको विज्ञप्तीमा आरोप लगाइएको छ ।

मुख्यमन्त्री कार्यालय, प्रदेश प्रमुख निवास, मन्त्रालय र मन्त्री निवासहरूमा आफ्ना पार्टीका नेता–कार्यकर्तालगायत आफ्ना नातागोतालाई खोप लगाउने गरिएको कार्कीको आरोप छ ।

आम नागरिकले दोस्रो डोजको खोप लगाउने बेला सकिन लाग्दासमेत खोप पाउन नपाउनु र प्रदेशमा भण्डारण गरी राखिएको खोप अनाधिकृत रूपमा दुरुपयोग हुनु दुर्भाग्यपूर्ण भएको विज्ञप्तिमा उल्लेख छ ।

पछिल्लो केही दिनयता प्रदेशका प्रमुख अस्पताल र ल्याबहरूमा पीसिआर परीक्षण बन्द भएको तथा स्थानीय तहबाट संकलित स्वाब नमूना पनि ल्याबहरूले परीक्षण गर्न छाडेको बताउँदै प्रदेश सरकारले नागरिकको स्वास्थ्यमाथि खेलवाड गरिहेको विज्ञप्तिमा भनिएको छ ।

कार्कीले परीक्षणलाई तीव्रता दिनुपर्ने बेलामा प्रदेश सरकारले किटको व्यवस्था गर्न नसकेको उल्लेख गर्दै सरकारी अस्पताल बन्द गरेर निजी अस्पतालमा बिरामी पठाउनुमा सरकारकै मानिसहरू कमिसनको खेलमा रहेको आशंका समेत गरेका छन् ।

सरकारले स्थापना गरेको ८० बेडको कोभिड–१९ उपचार केन्द्र मर्मतका नाममा सञ्चालनमा नआउनुले पनि प्रश्न खडा गरेको कार्कीको भनाई छ ।

पीसिआर परीक्षणलाई समुदायस्तरमा लगेर कन्ट्याक्ट ट्रेसिङका आधारमा अनिवार्य परीक्षण बढाउन आग्रह गर्दै कार्कीले सर्वसाधारणलाई खोप उपलब्ध गराउन र विपन्नलाई उचित राहतको व्यवस्था गर्न सरकारसँग माग गरेका छन् ।