रुकुम घटनाः जनार्दन शर्माले अपराधीलाई बचाउन खोजेको भन्दै प्रतिनिधिसभामा चर्काचर्की - News Birat

रुकुम घटनाः जनार्दन शर्माले अपराधीलाई बचाउन खोजेको भन्दै प्रतिनिधिसभामा चर्काचर्की

न्यूज विराट

काठमाडौं, जेठ १३–रुकुमको घटनालाई लिएर संघीय संसदको प्रतिनिधिसभामा चर्काचर्की भएको छ । प्रतिपक्षी दलले संसद बैठक अवरुद्ध गरेपछि बोल्ने क्रममा सत्ता पक्ष सांसदले वडा अध्यक्षको बचाउ गरेपछि प्रतिपक्षी सांसदले विरोध जनाएका थिए ।

सत्तारुढ नेपाल कम्युनिष्ट पार्टीका सांसद जनार्दन शर्माले सभापतिसँग समय लिएर बोल्ने क्रममा रुकुमको घटनालाई राजनीतिकरण गर्न खोजिएको आरोप लगाउँदै वडा अध्यक्षको बचाउ गर्न थालेपछि प्रतिपक्षका सांसदहरूले विरोध जनाएका हुन् । सांसद शर्माले आफू त्यस क्षेत्रको जनप्रतिनिध रहेकोले उक्त घटनामा बोल्न पाउन पर्ने धारणा राखेका थिए भने प्रतिपक्षका संसदले विरोध जनाएका थिए ।

बैठकमा चर्काचर्की हुन थालेपछि सभामुख अग्नि साप्कोटाले सयमित हुन आग्रह गरेका थिए । उनले यस विषयमा आफ्नो ध्यानाकर्षण भएको जनाउँदै गृहमन्त्री राम बहादुर थापाले जावफ दिन बताएका थिए ।

बैठक अवरुद्ध लगत्तै बोल्दै नेपाली कांग्रेस सांसदले मिन विश्वकर्माले विश्वव्यापी रूमामा फैलिएको कोरोना भाइरसले नेपालमा ४ जनाको ज्यान जाँदा जाजरकोट घटनामा १ घण्टामै ६ जनाको ज्यान लिएको तर सरकार गम्भीर नभएको आरोप लगाए ।

उनले त्रिशुलीमा बस खस्दा छानबिन समिति बनाउने तर जाजरकोट घटनामा छानबिन समिति नबनाएको भन्दै आक्रोश व्यक्त गरेका थिए । सत्ता पक्षका सांसदले पनि घटनालाई अतिरंजित नगर्न आग्रह गरेका थिए ।

गृहमन्त्री थापाले उक्त घटनाका बारेमा सांसदलाई जवाफ दिएका छन् । उनले ५ जनाको छानबिन समिति बनाएर घटनाको छानबिन सुरु गरिएको पनि बताएका छन् । शनिबार बेलुकी रुकुम पश्चिम चौरजहारी नगरपालिका–८ सोतीस्थित मल्ल थरकी युवतीलाई लिन गएका युवा र गाउँलेको बीचमा भएको झडपमा परी बेपत्ता भएका ३ जना युवाको शव फेला परेको छ । अझै ४ जना बेपता भएको बताइएको छ ।

प्रहरीका अनुसार जाजरकोटको भेरी नगरपालिका–४ का २१ वर्षीय युवा नवराज विककी प्रेमिका सोतीकी युवतीलाई लिन भनी १९ जना गएका थिए । सोतीमा गाउँले र ती युवाहरुबीच झडप हुँदा भेरी नगरपालिका–४ नवराज विक र चौरजहारी नगरपालिका–१ टीकाराम सुनार र भेरी नगरपालिका–४ गणेश बुढाको शव फेला परेको छ ।

सुनार र विकको शव आइतबार भेटिएको थियो भने गणेशको सोमबार भेटिएको छ । भेरी नगरपालिकाका सञ्जु विक, गोविन्द शाही, लोकेन्द्र सुनार र गोपाल बुढाथोकी शनिबारदेखि बेपत्ता छन् । घटनामा संलग्न रहेको आरोपमा चौरजहारी नगरपालिका–८ का वडाध्यक्ष डम्बर मल्लसहित स्थानीय १२ जनालाई प्रहरीले पक्राउ गरेको छ ।

मा प्रकाशित

यसमा तपाईको मत:

© Copyright 2017 - 2021 Newsbirat pvt ltd. All Rights Reserved.

Design / Developed by codebundles