विराटनगर, ९ जेठ । कोरोना भाइरसको संक्रमणका कारण विराटनगरका ६ जनासहित मोरङमा थप ११ जनाको मृत्यु भएको छ । शनिबार राति र आइतबार विहान मोरङको बुढीगंगा गाउँपालिकास्थित विराट शिक्षण अस्पतालमा चार, विराटनगरस्थित नोबेल शिक्षण अस्पतालमा चार, कोसी अस्पताल, न्यूरो अस्पताल र कोसी अस्पताल कोभिड १९ उपचार केन्द्रमा एक÷एक जनाको मृत्यु भएको हो ।

बुढीगंगास्थित विराट शिक्षण अस्पतालमा आइतबार बिहान विराटनगर महानगरपालिका– १३ का ७० वर्षीय पुरुष, विराटनगर– १० की ६३ वर्षीय महिला, विराटनगरका अर्का ५५ वर्षीय पुरुष र सुनसरीको इनरुवा– १ का ६५ वर्षीय पुरुषको शनिबार राति मृत्यु भएको अस्पतालका कोभिड १९ फोकल पर्सन सुनिल देवले जानकारी दिए ।

त्यस्तै विराटनगरस्थित नोवेल क्षिण अस्पतालमा शनिबार राति विराटनगर– २ का ९१ वर्षीय पुरुष, झापाको अर्जुनधारा–११ का ५२ वर्षीय पुरुष, सप्तरी महादेवा २ की ६० वर्षीय महिला र धरान– १५ की ५५ वर्षीय महिलाको आइतबार बिहान मृत्यु भएको अस्पतालका प्रवन्धक नारायण दाहालले जानकारी दिए ।

त्यस्तै विराटनगरकै कोसी अस्पतालमा धनकुटाको धनकुटा नगरपालिका– १ का ५३ वर्षीय पुरुष, न्यूरो अस्पतालमा विराटनगर–७ का ३३ वर्षीय पुरुष र कोसी अस्पताल कोभिड १९ उपचार केन्द्रमा विराटनगर–३ का ७६ वर्षीय पुरुषको आइतबार बिहान मृत्यु भएको अस्पतालहरुले जानकारी दिएका छन् ।