विराटनगर, ५ जेठ । नयाँ भेरियन्टको कोरोना संक्रमण समुदायस्तरमा फैलँदै गएपछि मोरङको सुनवर्षी नगरपालिकाले सुविधासम्पन्न आइसोलेसन केन्द्र सञ्चालनमा ल्याएको छ । कोरोना संक्रमण समुदायस्तरमा फैलँदै गएपछि नगरपालिकाले वडा नं. २ स्थित अमरदह स्वास्थ्य चौकीमा अक्सिजनसहितको सुविधासम्पन्न २० शैयाको आइसोलेसन केन्द्र बुधबारदेखि सञ्चालनमा ल्याएको हो ।

अस्पतालहरुमा अक्सिन र बेडको अभाव भएर संक्रमितको उपचारमा समस्या भइरहेकाले नगरका अक्सिजन चाहिँने संक्रमितको उपचारका लागि आइसोलेसन केन्द्र सञ्चालनमा ल्याइएको नगरप्रमुख कालीप्रसाद दासले जानकारी दिनुभयो ।

उहाँका अनुसार सो आइसोलेसन केन्द्रमा संक्रमितको उपचारका लागि पब्लिक हेल्थ अफिसर, एमबिबिएस चिकित्सकसहित १६ जना स्वास्थ्यकर्मीको टोलि परिचालन गरिएको छ । उहाँले आवश्यक परेको खण्डमा थप स्वास्थ्यकर्मी परिचालन गरिने बताउनुभयो । नगरप्रमुख दासले संक्रमितको संख्या थप बढ्दै गएको खण्डमा वडा नं. ९ स्थित वीपी सेवा केन्द्र डाईनिया र नगरपालिकाका सवै स्वास्थ्य चौकिमा आईसोलेसन सेन्टर निर्माण गर्ने तयरिसमेत थालिएको बताए ।