विराटनगर, ११ वैशाख । यस वर्षको जनार्दन मैनाली स्मृति पत्रकारिता पुरस्कार मकालु टेलिभिजनका समाचार सम्पादक कमल पौडेललाई समर्पण गरिएको छ । प्रेस चौतारी मोरङले आज विराटनगरमा कार्यक्रम गरी १५ हजार ५१ हजार रुपैयाँ राशिको जनार्दन मैनाली स्मृति पत्रकारिता पुरस्कार पौडेललाई समर्पण गरेको हो ।

क्यान्सर रोगबाट पीडित पौडेल विगत साढे दुई दशकदेखि पत्रकारितामा सक्रिय छन् । थप उपचारका लागि काठमाडौं जानु भएका कारण पत्रकार पौडेलका छोरा अभिन्न पौडेलले पुरस्कार ग्रहण गरे । पौडेललाई भूमि सुधार तथा गरिबी निवारण मन्त्री डा. शिवमाया तुम्बाहाम्फेले नगद र सम्मानपत्र समर्पण गरेकी थिइन् । कार्यक्रमलाई सम्बोधन गर्दै मन्त्री तुम्वाहाम्फेले पत्रकारिता क्षेत्र समाजको ऐना भएकाले तथ्य सत्य कुराहरुलाई मात्रै उजागर गर्न आग्रह गरिन् ।

कार्यक्रममा नेपाल पत्रकार महासंघ प्रदेश नम्बर १ का अध्यक्ष लिलाबल्लब घिमिरे, नेकपा एमाले मोरङ अध्यक्ष ऋषिकेश पोखरेल, जनार्दन मैनाली पत्रकारिता पुरस्कारकी संरक्षक कमला मैनाली, प्रदेश १ सञ्चार प्रतिष्ठानका निर्देशक यज्ञ शर्मा, प्रेस चौतारी मोरङका पूर्वअध्यक्ष महेन्द्र विष्ट, प्रेस चौतारी मोरङका पूर्वअध्यक्ष माधव अधिकारीलगायतले शुभकामना मन्तव्य व्यक्त गरेका थिए ।