जनकपुर, ६ वैशाख-गएराति आएको हावाहुरी र असिनाबाट रौतहटमा करोडौंको क्षति पुगेको छ । बर्षासँगै आएको असिनापानीले तरकारी, फलफूल तथा हिउँदे बालीमा करोडौंको क्षति पुगेको हो ।

हावाहुरी र असिनाले जिल्लाको चन्द्रपुर नगरपालिकाको सिन्दुरेघारी, नजरपुर, सन्तपुर, चेतनगर, बेतौना, लगायतका स्थानको दलहन तथा तरकारी बाली नष्ट भएको स्थानियले बताएका छन् ।

शुक्रबार रातिको हुरीले रौतहटको अधिकांश स्थानीय तहमा घरटहरासमेत भत्किएका छन् । असिनासहित आएको हावाहुरीले घरका छानामा लगाइएको टायल फुट्नुका साथै खरका छाना र जस्तासमेत उडाएको स्थानीयले बताएका छन् ।यमुनामाई गाँउपालिकामा रहेको तरकारी बजारको टहराको छानोसमेत हुरीले उडाएको छ ।