प्रमुख प्रतिपक्षी दलका नेता शेरबहादुर देउवा सरकारले अध्यादेश फिर्ता नगरेसम्म संवैधानिक परिषद् बैठकमा नजाने भएका छन् ।

तीन सदस्यीय सदस्य उपस्थित हुँदा बैठक बस्न सक्ने र त्यसबाटै बहुमतीय आधारमा नियुक्ति गर्न सक्ने प्रावधानसहित संवैधानिक परिषद्सम्बन्धी अध्यादेश सरकारले मंगलबार जारी गरेको थियो ।

अध्यादेश फिर्ता नभएसम्म देउवा बैठकमा सहभागी नहुने कांग्रेसका प्रवक्ता विश्वप्रकाश शर्माले बताए । ‘अध्यादेश फिर्ता नगर्दासम्म प्रतिपक्षी दलका नेता संवैधानिक परिषद्को बैठकमा सहभागी हुनुहुन्न,’ शर्माले भने ।

प्रधानमन्त्री केपी ओलीले अध्यादेश फिर्ता नलिँदै संवैधानिक परिषद्को बैठक फेरि बोलाएका छन् । साँझ ५ बजे बैठक बोलाइएको प्रधानमन्त्रीको सचिवालयले जनाएको छ ।