एजेन्सी, चैत १९-विश्वव्यापी महामारी बनेको कोरोना भाइरस संक्रमणका कारण एकै दिनमा थप ४ हजार ३ सय ४१ जनाको मृत्यु भएको छ भने ७२ हजार ७ सय ४९ नयाँ संक्रमित थपिएका छन् । यो कोरोना भाइरसबाट विश्वमा एकै दिनमा भएको सबैभन्दा बढी मृत्यु र संक्रमण हो । यसबाट कोरोना भाइरसका कारण मृत्यु हुने गति लगातार बढेको छ ।

कोरोना भाइरसको नयाँ केन्द्र अमेरिकामा एकै दिनमा ७ सय २६ जनाको मृत्यु भएको छ भने २४ हजार १२९ जना नयाँ संक्रमित थपिएका छन् ।यसले अमेरिकामा चिन्ता थप बढाएको छ । अमेरिकामा मृत्यु हुनेको संख्या ३ हजार ८ सय ६७ पुगेको छ भने एक लाख ८७ हजार ९ सय १७ जना संक्रमित भएका छन् । अमेरिकाले कोरोनाबाट मृत्यु हुनेमा पनि चीनलाई उछिनेको छ ।

यसअघि मंगलबार नै संक्रमित हुनेको संख्या चीनमा भन्दा दोब्बर बढी भएको थियो ।अमेरिका पछि इटलीको अवस्था भयावह छ । कोरोना भाइरसका कारण सबैभन्दा बढी मानिसले ज्यान गुमाएको इटलीमा पछिल्लो २४ घन्टामा मात्रै थप ८ सय ३७ जनाको मृत्यु भएको छ ।

इटलीमा मृत्यु हुनेको संख्या १२ हजार ४ सय २८ पुगेको छ भने १ लाख ५ हजार ७ सय ९२ जना संक्रमित भएका छन् ।यता स्पेनमा पनि केही दिनदेखि मृत्युदर उच्च छ । स्पेनमा पछिल्लो २४ घन्टामा ७ सय ४८ जनाको मृत्यु भएको छ । त्यहाँ हालसम्म ८ हजार ४ सय ६४ जनाको मृत्यु भएको छ भने ९५ हजार ९ सय २३ जना संक्रमित भएका छन् ।

फ्रान्समा पनि मृत्युदर उच्च देखिएको छ । पछिल्लो २४ घन्टामा फ्रान्समा ४ सय ९९ जनाले ज्यान गुमाएका छन् । यो सँगै फ्रान्सले पनि मृत्यु संख्यामा चीनालाई उछिनेका छ । त्यहाँ ३ हजार ५ सय २३ जनाको मृत्यु भएको छ । यस्तै इरानमा २ हजार ८९८, बेलायतमा १ हजार ७ सय ८९ जनाको मृत्यु भएको छ ।

कोरोना भाइरस पहिलो पटक देखिएको चीनमा भने नयाँ संक्रमित र मृत्यु हुनेको संख्या थपिएको छैन चीनमा कुल संक्रमितको संख्या ८१ हजार ५ सय १८ रहेको छ भने ३ हजार ३०५ जनाको मृत्यु भएको छ ।

विश्वभर कोरोना भाइरसका कारण मृत्यु हुनेको संख्या ४२ हजार १ सय १४ पुगेको छ भने ८ लाख ५७ हजार ४ सय ८७ जना संक्रमित भएका छन् । अहिलेसम्म एक लाख ७७ हजार १४१ जना उपचारपछि निको भएर घर फर्किएका छन् ।