उनले सीमा क्षेत्रमा सुरक्षाकर्मी र बीओपी थप हुने क्रममा रहेको जानकारी दिए । भारतले नेपाली भूमी मिच्दै गएपछि आफ्नो भूमिको रक्षाको लागि नेपाल सरकारले गत ३१ वैशाखमा सशस्त्र प्रहरीको बोर्डर आउट पोष्ट (बीओपी) स्थापना गरेकोमा अहिले गुल्ममा स्तरोन्नती गरिएको छ । गत असार २८ गते बसेको मन्त्रिपरिषदको निर्णय अनुसार छाङरु सशस्त्रको गुल्म स्थापना गरिएको गृहमन्त्री थापाले बताए ।

नेपाल सरकारले भारतद्धारा अतिक्रमित कालापानी, लिपुलेक र लिम्पियाधुरासहितको भूगोल समेटर नयाँ नक्सा जारी गरिसकेको छ । नक्सामा समेटिएको भूमि फिर्ता गर्ने र सीमा क्षेत्रमा सुरक्षा उपस्थिती बढाउने कामलाई सरकारले प्राथमिकतामा राखेको छ। व्याँसकै तिङ्कर र कौवामा पनि बीओपी स्थापना हुने उनले बताए । अहिले ब्यासको गुल्ममा सशस्त्र प्रहरी नायब उपरीक्षक धिरेन्द्र शाहले नेतृत्व गरिरहेका छन्।

गृहमन्त्री थापासँगै ब्यासको छांगरुमा सशस्त्र प्रहरीका आइजिपी शैलेन्द्र खनाल, गृह सचिव महेश्वर न्यौपाने, दार्चुलाबाट निर्वाचित सांसद गणेश ठगुन्ना, गृहमन्त्रीका राजनीतिक सल्लाहकार सूर्य सुवेदी, सुरक्षा सल्लाहकार ईन्द्रजीत राई, नेपाली सेनाका सहायक रथी पवनराज घिमिरे, सशस्त्र प्रहरीका एआइजी रामशरण पौडेललगायत १२ जनाको टोली काठमाडौंबाट नेपाली सेनाको एनए ०५७ नम्बरको हेलिकोप्टरमार्फत छाङरु पुगेको हो ।