३० साउनमा गठन भएको नेकपा कार्यदलले शनिबार आफ्नो प्रतिवेदन बुझाएको थियो । कार्यदलको प्रतिवेदनबारे २अध्यक्षबीच छलफल भएपछि सचिवालय बैठक बस्ने बताइएको छ । प्रतिवेदनमाथि सचिवालयमा छलफल भएर स्थायी कमिटी बैठकमा छलफलसहित अनुमोदनका लागि लैजाने तयारी छ ।

कार्यदलले मध्यमार्गी बाटोसहितको प्रतिवेदन पेस गरेको छ । प्रधानमन्त्रीले राजीनामा दिनु नपर्ने र पार्टी कामलाई पनि विधिपूर्वक सञ्चालन गर्दैजाने सुझाव प्रतिवेदनमा रहेको कार्यदलका सदस्यहरूले बताएका छन् ।

८ दिन लगाएर तयार गरेको प्रतिवेदनमा यसअघि केन्द्रीय कमिटी बैठकले तय गरेको एकता महाधिवेशन २०७७ चैत २५ देखि ३० गतेसम्म गर्नुपर्ने सुझाव दिएको छ ।

त्यस्तै, सरकारको कामकाजलाई प्रभावकारी बनाउनुपर्ने, त्यसका लागि पार्टीको परामर्शमा सरकारले काम गर्नुपर्ने, पार्टीका कुनै नेताले प्रधानमन्त्री केपी शर्मा ओलीसँग कार्यकाल भरी राजीनामा माग्न नहुनेसमेत सुझाव दिएको छ ।