मस्को, ७ भदौ–रुसले कोरोना भाइरसविरुद्ध पहिलो खोप विकास गरेको रुसले पुनः दोस्रो खोप पनि बनाएको दाबी गरेको छ । रुसको दोस्रो खोपको परीक्षण सेप्टेम्बरमा पूरा हुने बताइएको छ । यो खोपको नाम एपिभ्याककोरोना राखिएको छ । रुसले यो खोपको कुनै ‘साइड इफेक्ट’ नभएको समेत बताएको छ ।

यसअघि रुसी राष्ट्रपति भ्लादिमिर पुटिनले स्पुतनिक भी नामको कोरोनाविरुद्धको खोप बनाएको घोषणा गरेका थिए । यद्यपि यो खोपको केही साइड इफेक्ट भएको भन्दै आलोचना भएको थियो । यो खोप साइबेरियन भेक्टर अनुसन्धान केन्द्रले विकास गरेको हो । यसअघि विश्व स्वास्थ्य संगठन (डब्लुएचओ) ले कोरोना भाइरसविरुद्धको खोप सन् २०२१ अघि उपलब्ध नहुने बताएको थियो ।

रुसको एपिभ्याककोरोना खोपको निर्माण साइबेरियामा सोभियत संघको एक प्रमुख गोप्य बायोलोजिकल हतियारको प्लान्टमा भइरहेको छ । स्पुतनिक न्युजका अनुसार रुसको उपभोक्ता अधिकार संरक्षण र मानव कल्याण वाचडग रोसोट्रेबनादजोरले भने, ‘पहिलो चरणमा १४ र दोस्रो चरणमा ४३ जनालाई खोप दिइएको थियो ।’

यो परीक्षणमा सहभागी भएका सबैलाई राम्रो भएको छ । वैज्ञानिकका अनुसार खोप दिइएकाहरुलाई २३ दिनसम्म अस्पतालमा राखिएको थियो । सो समयमा गरिएको परीक्षणमा कसैमा पनि साइड इफेक्ट देखिएको छैन ।

यसैबीच घरेलु विनियामक अनुमोदन प्राप्त गर्नका लागि देशको पहिलो सम्भावित कोभिड–१९ को खोपको सामूहिक परीक्षणमा ४० हजारभन्दा बढी मानिसले सहभागिता जनाउँनेछन् ।

आगामी साता एक विदेशी अनुसन्धान निकायले यसको निरीक्षण गर्नेछ । एक अधिकारीले खोपको डाटा यसै महिनाको अन्तिममा एक शैक्षणिक पत्रिकामा प्रकाशित गरिने जानकारी दिएका छन् ।