विराटनगर, ३२ साउन–विराटनगरमा थप ४३ जनामा कोरोना संक्रमण पुष्टि भएको छ । शनिबार राति ४३ जना कोरोना संक्रमित थपिएको विराटनगर महानगरपालिका जनस्वास्थ्य महाशाखा प्रमुख रमेश कार्की जानकारी दिए । उनका अनुसार थपिएका संक्रमितहरु ५ देखि ६३ वर्ष उमेर समुहका रहेका छन् ।

उनीहरूको २७ र २८ गते स्वाब संकलन गरिएपनि रिपोर्ट शनिबार राती पोजेटिभ आएको हो । संक्रमित मध्ये २४ जना पुरुष र १९ जना महिला रहेका छन् । विराटनगरमा शनिबार दिउँसो ३८ जना कोरोना संक्रमित थपिएका थिए ।

सबैभन्दा बढी विराटनगर– ६ मा ७ जना संक्रमित थपिएका छन् भने विराटनगर ३, ९, ११ र १५ मा ६÷६ जना, विराटनगर २ र ५ मा ४÷४ जना, विराटनगर–४ मा ३ जना, विराटनगर–८ मा १ जना संक्रमित थपिएका छन् ।

योसँगै विराटनगरमा संक्रमितको संख्या ५ सय २३ पुगेको छ । संक्रमित मध्ये ८६ जना कोरोना मुक्त भएर घर फर्किएका छन् । विराटनगरमा मात्र कोरोना संक्रमणबाट ७ जनाको ज्यान गइसकेको छ ।

कोरोना परिक्षणको रिपोर्ट आउन ढिलाई हुँदा समुदायमा तिब्र गतिमा कोरोना संक्रमण फैलिएको भन्दै कोशी अस्पतालसँगको साझेदारीमा विराटनगर महानगरपालिकाले छुट्टै पिसिआर मेसिन खरिद गर्ने तयारी थालिसकेको छ ।