एजेन्सी, २७-कोरोना संक्रमणपछि उपचारका लागि अस्पताल भर्ना भएका भारतका पूर्वराष्ट्रपति प्रणव मुखर्जीलाई भेन्टिलेटरमा राखिएको छ । उनको अवस्था चिन्ताजनक रहेको भारतीय सञ्चारमाध्यमले जनाएका छन् ।

उनको दिल्लीस्थित एक सैन्य अस्पतालमा उपचार भइरहेको छ । समाचार एजेन्सी एएनआईका अनुसार सोमबार सैनिक अस्पतालमा भर्ना भएका उनको मस्तिष्कको एक साइडको इमर्जेन्सी अपरेशन गरिएको थियो । अस्पतालका अनुसार उनको ज्यान बचाउनका लागि आवश्यक थियो ।

अस्पतालका अनुसार अपरेशनपछि उनको अवस्था चिन्ताजक बनेको छ र उनलाई भेन्टिलेटरमा राखिएको छ । पूर्वराष्ट्रपति मुखर्जीले सोमबार ट्विट गर्दै आफूलाई कोरोना संक्रमण भएको र अस्पतालमा उपचारका लागि भर्ना हुन लागेको जानकारी दिएका थिए ।

उनले स्वास्थ्य जाँच गराउन अस्पताल गएको समयमा कोरोना परीक्षण हुँदा आफूलाई कोरोना संक्रमण देखिएको भन्दै आफ्नो सम्पर्कमा आएकाहरुलाई परीक्षण गर्न आग्रह गरेका थिए ।