काठमाडौं, ८ साउन-पछिल्लो २४ घण्टामा थप १४७ जनामा कोरोना भाइरस संक्रमण पुष्टि भएको छ । स्वास्थ्य तथा जनसंख्या मन्त्रालयको नियमित पत्रकार सम्मेलनमा डा. जागेश्वर गौतमले देशभरका विभिन्न स्थानमा गरिएको परीक्षणका क्रममा थप १४७ जनामा कोरोना संक्रमण देखिएको पुष्टि गरेका हुन् ।

योसँगै नेपालमा कुल कोरोना संक्रमितको संख्या १८ हजार २४१ पुगेको छ । सक्रिय सक्रमितको संख्या ५ हजार ३५८ रहेको छ । उनीहरूको देशभरका विभिन्न आइसोलेसन सेन्टरमा उपचार भइरहेको मन्त्रालयले जनाएको छ ।

त्यस्तै पछिल्लो २४ घण्टामा थप १५६ जनाले कोरोनालाई जितेर डिस्चार्ज भएका छन् । यसरी डिस्चार्ज हुनेको कुल संख्या १२ हजार ८४० पुगेको छ । स्वास्थ्य मन्त्रालयका अनुसार अहिलेसम्म ७०.३९ प्रतिशत संक्रमितहरू निको भएर घर फर्किएका छन् ।

पछिल्लो २४ घण्टाको अवधिमा ३ हजार ४८१ जनाको कोरोना परीक्षण गरिएको छ । २० हजार ९८ जना अहिले देशका विभिन्न स्थानका क्वारेन्टाइनमा रहेका छन् भने ५ हजार ३५८ को आइसोलेसनमा उपचार भइरहेको स्वास्थ्य मन्त्रालयले जनाएको छ ।