जनकपुर, २४ असार-केपी ओली सरकारको समर्थनमा जनकपुरधाममा जुलुस प्रदर्शन गरिएको छ । मोटरसाइकलमा सवार कार्यकर्ताले निकालेको जुलुसले नगर परिक्रमा गरेको थियो ।

‘पार्टी फुटाउन पाइँदैन, स्थिर सरकार ढाल्न पाइँदैन, नेकपा जिन्दावाद, ओली सरकार जिन्दावाद, राष्ट्रियता कायम गर, भारतीय दलाल मुर्दावाद’लगायतका नारा लेखिएको प्लेकार्डसहित नेकपा समर्थित दर्जनौँ युवा संलग्न भई सङ्कट मोचनबाट सुरु भएको मोटरसाइकल र्‍याली थापाचोक, पिडारीचोक, रामानन्दचोक, भ्रमरपुराचोक, विश्वकर्माचोक, विद्यापतिचोक, कदमचोक, भानुचोक, शिवचोक हुँदै जनकचोकमा गई कोणसभामा परिणत भएको थियो ।

नेकपाका केही नेताहरूलाई देशी, विदेशी समूहले विभिन्न नाममा उचालेर पार्टी टुक्र्याएर अस्थिरता निम्त्याउनतर्फ भारतलगायतका शक्ति राष्ट्रहरू लागेका हुँदा पार्टी एकतालाई कायम राख्न आग्रह गर्दै आफूहरूले दबाब स्वरूप र्‍याली निकालेको जनकपुरधाम उपमहानगरपालिका- १३ का वडाध्यक्षसमेत रहेका नेकपा नेता शुभनारायण मण्डलले बताए ।

उनले भने, ‘अहिलेको सन्दर्भमा राष्ट्रिय मुद्दा नै ठूलो छ र केपी ओलीको सरकार ढालेर अरू कसैको नेतृत्वमा सरकार बनेमा राष्ट्रियता, सीमाङ्कन र नागरिकतासम्बन्धी मुद्दा कमजोर हुन्छ ।’ केपी ओली नेतृत्वको सरकारलाई कसैले ढाल्न खोजेमा जनता सडकमा सशक्त रूपमा प्रतिवादमा उत्रने चेतावनीसमेत मण्डलले दिए ।

विश्व नै कोरानाका कारण अस्तव्यस्त भइरहेको सन्दर्भमा सरकार त्यसको नियन्त्रणका लागि प्रयत्नशील रहेको, नक्सा, नागरिकता र राष्ट्रियताको सवालमा सरकार जुधिरहँदा बेमौसमी बाजा बजाएर प्रधानमन्त्री ओलीको राजीनामा माग्नु भारतीय दलालीबाहेक केही नरहेको मण्डलले जिकिर गरे ।