काठमाडौं, १० असार-नागरिकता विधेयकको विरोधमा जनता समाजवादी पार्टी (जसपा) ले देशभर प्रर्दशन गर्ने निर्णय गरेको छ । अंगीकृत नागरिकता ७ वर्षपछि दिने प्रावधानको विरोध गर्दै जसपाले देशभर प्रदेश गर्ने निर्णय गरेको हो ।

आज प्रेस विज्ञप्ति जारी गर्दै जसपाले असार १६ गते सबै जिल्लामा ७ वर्षे प्रावधानप्रति विरोध जनाउँदै सभा गर्ने भएको छ । पार्टी अध्यक्षद्वय महन्थ ठाकुर र उपेन्द्र यादवद्वारा जारी विज्ञप्तिमा सो संशोधन प्रस्ताव पारित भए महिला हिंसालाई प्रोत्साहन गर्ने उल्लेख गरिएको छ ।

‘संविधानको मूल्य मान्यता र मर्म तथा प्राकृतिक न्यायको सिद्धान्त बिपरित रहेको संशोधन प्रस्तावले महिला अधिकारको हनन् हुनुका साथै नेपाल पक्ष राष्ट्र रहेको सबै प्रकारका भेदभाव उन्मूलन सम्बन्धी अन्तर्राष्ट्रिय महासन्धीको पनि विरुद्धमा छ,’ विज्ञप्तिमा भनिएको छ, ‘यस्ता विभेदकारी प्रावधानको जनता समाजवादी पार्टी, नेपाल घार भत्र्सना तथा निन्दा गर्दछ ।’