काठमाडौं, ८ असार-विश्व स्वास्थ्य संगठन (डब्लूएचओ) को नेपालस्थित कार्यालयले कोभिड-१९ को महामारी कायमै रहेकाले पर्याप्त सतर्कता अपनाउन सार्वजनिक रूपमा अपिल गरेको छ ।

डब्लूएचओका प्रमुख डा. जोस भ्यान्डेलरले नेपाल सरकारले लडकडाउन खुकुलो बनाए पनि कोभिड-१९ को महामारी टरिनसकेकाले आवश्यक सतर्कता अपनाउन सबैलाई अपिल गरेका हुन् । लकडाउन खुकुलो बनाएसँगै सर्वसाधारणको क्रियाकलाप बढ्दै गएको, कार्यालय सञ्चालन भएको तथा एकआपसमा भेटघाटलगायत बढेको भन्दै उनले त्यस क्रममा सबैले आआफ्नोतर्फबाट थप सर्तक हुनु जरुरी रहेको बताए।

उनले संक्रमण नियन्त्रणका लागि प्रत्येक व्यक्तिले आ-आफ्नो तर्फबाट जीवनशैली र कार्यशैलीमा परिर्वतन ल्याउनुपर्ने आवश्यकता औँल्याए । उनले मानिसहरूको भीडभाडमा नजाने, जानै परे दूरी कायम गर्ने, मास्क लगाउने तथा बेला बेलामा साबुन पानीले हात धुन पनि आग्रह गरे ।

‘लकडाउन हामी सबैका लागि गाहो कुरा थियो । घरमै बस्नुपर्‍यो । साथीभाइलाई भेट्न पाइएन । काममा जान पाइएन । अहिले लकडाउन केही हदसम्म खुकुलो भएको छ र हामी वरपर जान पाएका छौँ,’ उनले भने, ‘काममा जान पाएका छौँ । नातेदार परिवारहरूलाई भट्न जान पाइरहेका छौँ । तर, हामीले याद गर्नुपर्ने कुरा के हो भने महामारी अझै पनि गइसकेको छैन ।’