काठमाडौं, ६ असार-शनिबार काठमाडौं उपत्यकाका ८ जनामा कोरोना भाइरस (कोभिड-१९) संक्रमण पुष्टि भएको छ । स्वास्थ्य तथा जनसंख्या मन्त्रालयको नियमित पत्रकार सम्मेलनमा प्रवक्ता डा जागेश्वर गौतमले उपत्यकाका थप ८ जनामा कोरोना भाइरस संक्रमण पुष्टि भएको जानकारी दिएका हुन् ।

उनका अनुसार भक्तपुरका ७ जना महिलामा कोरोना संक्रमण पुष्टि भएको छ । त्यसैगरी, काठमाडौंमा पनि १ महिलामा कोरोना संक्रमण पुष्टि भएको छ । शुक्रबार पनि काठमाडौंका ३ जनामा कोरोना संक्रमण पुष्टि भएको थियो ।

योसँगै काठमाडौंमा ४१ जना र भक्तपुरमा १६ जनामा कोरोना संक्रमण देखिएको छ । उपत्यकाका ३ जिल्लामा भने ६२ जनामा कोरोना संक्रमण पुष्टि भएको स्वास्थ्य मन्त्रालयको तथ्यांक छ ।

शनिबार देशभर ३३१ जनामा कोरोना पुष्टि भएको छ । योसँगै संक्रमितको कुल संख्या ८ हजार ५०३ पुगेको छ । अहिलेसम्म देशभरका विभिन्न आइसोलेसन सेन्टरबाट उपचार गराएर  १ हजार ५७८ डिस्चार्ज भएका छन् । पछिल्लो २४ घण्टामा मात्रै १७६ जना संक्रमणमुक्त भएको मन्त्रालयले जनाएको छ ।