एजेन्सी, असार २-लद्दाखको गलवानमा भारत र चीनका सैनिकबीच झडप भएको छ । झडपमा भारतीय एक सैनिक अधिकारीसहित ३ जनाको ज्यान गएको भारतीय सरकारको भनाइलाई उद्धृत गर्दै बीबीसी हिन्दीले लेखेको छ ।

भारतीय र चिनियाँ सैनिकबीच लद्दाखको विकट गलवान उपत्यकामा सङ्घर्ष भएको भारत सरकारले पुष्टि गरेको हो । भारत सरकारका अनुसार भारतीय सैनिकहरू सीमाबाट पछि हट्दा उक्त घटना भएको हो ।

बीबीसी हिन्दीका अनुसार भारतीय सेनाले भारत-चीन सीमामा सोमबार राति भिडन्त हुँदा एक वरिष्ठ सैन्य अधिकारीसहित ३ सैनिकको मृत्यु भएको पुष्टि गरेको छ ।

भारतीय सैनिक मुख्यालयले जारी गरेको वक्तव्यमा चिनियाँ पक्षतर्फ पनि केही क्षति पुगेको उल्लेख छ । यद्यपि चीनतर्फ कति सैनिकको मृत्यु र घाइते भए भन्ने बारेमा स्पष्ट जानकारी आइसकेको छैन ।

सैनिक मुख्यालयका अनुसार दुवै देशका वरिष्ठ सैनिक अधिकारी अहिले उक्त घटनालाई सुल्झाउनका लागि घटनास्थलमै बैठक बसिरहेका छन् । केही समययता लद्दाखको गलवान क्षेत्रमा चिनियाँ सेना प्रवेश गरेकाले विवाद बढेको भारतीय पक्षको भनाइ छ । गलवान उपत्यकामा भारत-चीनको लद्दाख सीमा रेखाको क्षेत्र हो ।