पोखरा, १९ जेठ-पोखरामा एक जनाको उपचारको क्रममा मृत्यु भएको छ । स्याङ्जा फेदीखोला गाउँपालिका खहरेका खड्कबहादुर कार्कीको पोखरा स्वास्थ्य विज्ञान प्रतिष्ठानअन्तर्गतको पश्चिमाञ्चल क्षेत्रीय अस्पतालमा उपचारका क्रममा मृत्यु भएको हो ।

भारतबाट आएर फेदीखोला गाउँपालिकाले बनाएको क्वारेन्टाइनमा ५ दिन बसेपछि स्वाब परीक्षणमा नेगेटिभ देखिएपछि घर फर्किएका कार्कीको आकस्मिक कक्षमा उपचारका क्रममा मृत्यु भएको अस्पतालले जनाएको छ ।

शुक्रबार उनको स्वाब परीक्षणमा कोरोना नेगेटिभ देखिएको पश्चिमाञ्चल अस्पतालका निर्देशक डा. अर्जुन आचार्यले जानकारी दिए । आइतबार साँझ उपचारका क्रममा उनको अस्पतालमा मृत्यु भएपछि थप परीक्षणका लागि स्वाब पुन: संकलन गरिएको उनले बताए ।

‘पीसीआर रिपोर्टमा नेगेटिभ आएपछि घरमा गएका कार्कीको अन्य रोगका कारण मृत्यु भएको हुन सक्छ,’ उनले भने, ‘कोरोना भाइरस नेगेटिभ देखिएको थियो । फेरि पनि हामीले कोरोना परीक्षणका लागि स्वाब लिएका छौँ ।’ मृतकको शव पश्चिमाञ्चल क्षेत्रीय अस्पतालमै राखिएको छ ।