एजेन्सी, जेठ १७-मलेसियाका विकासवादी तथा लोकप्रिय नेता पूर्व प्रधानमन्त्री महाथिर मोहम्मद आफ्नै पार्टीबाट बर्खास्त भएका छन् । बरसातु पार्टीबाट महाथिर, उनका छोरा र अन्य तीन जना वरिष्ठ नेताहरु निस्कासनमा परेका हुन् । यद्यपि ९४ वर्षीय महाथिरले पार्टीको सो निर्णयविरुद्ध चुनौती दिने भएका छन् ।

उनले गत फेब्रुअरीमा प्रधानमन्त्री पदबाट राजीनामा दिएका थिए । त्यसपछि मोहिउद्दिन यासिन मलेसियाको प्रधानमन्त्री बनेका छन् । मोहिउद्दिन उनकै पार्टीका नेता हुन् र उनलाई सो पार्टीको विरोधका बाबजुद प्रधानमन्त्री बनाइएको थियो ।

त्यसपछि पार्टीमा विवाद आएर दुई धारमा बाँढिएको छ । यसै क्रममा पार्टीका अध्यक्षका लागि महाथिरका छोरा मुखरिज महाथिरले मोहिउद्दिनलाई चुनौती दिएका थिए । तर कोरोना भाइरसका कारण पार्टीको अध्यक्ष पदका लागि हुने निर्वाचन रोकिएको छ ।

पार्टीबाट बर्खास्त गरिएपछि महाथिर, उनका छोरा र अन्य चार जनाले संयुक्त विज्ञप्ति जारी गर्दै भनेका छन्, ‘बरसातू अध्यक्षले हामीलाई कुनै ठोस कारण बिना हामीलाई बर्खास्त गरेका छन् । यसल एकातर्फ पार्टीको चुनावलाई लिएर उत्पन्न डरलाई देखाउँछ । अस्थिर प्रधानमन्त्रीका रुपमा मोहिउद्दिनले आफ्नो असुरक्षित स्थितिका कारण यो कदम उठाएका हुन् ।’

उनले पार्टी अध्यक्षको कदम गलत भएको भन्दै यसकाविरुद्ध चुनौती दिने र कानुनी उपाय समेत खोज्न सक्ने बताएका छन् । मलेसियामा महाथिर र अनवर इब्राहिमबीच सत्तारुढ ‘प्याक्ट अफ होप’ गठबन्धन टुटेपछि सत्ताको संघर्ष चर्किएको हो ।

यो गठबन्धनले दुई वर्षअघि नजीब रजाकको सरकारविरुद्ध ऐतिहासिक जीत हासिल गरेका थियो । यसपछि महाथिर दोस्रो पटक मलेसियाको प्रधानमन्त्री बनेका थिए ।

तर उनले फेब्रुअरीमा राजीनामा दिएपछि नयाँ प्रधानमन्त्रीको दौड सुरु भएको थियो । जसमा मलाय मुस्लिम बुहसंख्यकहरुको साथ रहेका यासिनले बाजी मारेका थिए ।