काठमाडौं, १६ जेठ-स्वास्थ्य तथा जनसंख्या मन्त्रालयको पछिल्लो विवरणअनुसार नेपालमा थप १ जना ७० जनामा कोरोना भाइरस संक्रमण देखिएको छ । स्वास्थ्य मन्त्रालयका प्रवक्ता डा. विकास देवकोटाका अनुसार देशका विभिन्न प्रयोगशालामा गरिएको परीक्षणमा आज १ सय ६५ जना पुरुष र ५ जना महिलामा संक्रमण देखिएको हो ।

कोसी अस्पतालको प्रयोगशालमा २७ जनामा पोजेटिभ देखिएको छ । सबै झापाका रहेका छन् । धरानको बीपी कोइराला स्वास्थ्य विज्ञान प्रतिष्ठानमा गरिएको परीक्षणमा सप्तरी राजविराजका ४ जना र झापाको भद्रपुरका १ जनामा संक्रमण पुष्टि भएको छ ।

त्यस्तै, नारायण अस्पतालको प्रयोगशालामा गरिएको परीक्षणमा ९ जनामा संक्रमण देखिएको छ । संक्रमण पुष्टि भएका बाराका ४ जना, पर्सा पोखरियका ४ जना र जिराभवानीका १ जना रहेका छन् ।

त्यसैगरी, पाटन अस्पतालमा १ जनालाई पोजेटिभ देखिएको छ । उनी पाटन अस्पतालमै रहेका छन् । गण्डकी अस्पतालमा गरिएको परीक्षणमा १ जनालाई पोजेटिभ देखिएको छ । उनी म्याग्दीका हुन् ।

भेरीमा गरिएको परीक्षणमा १० जनालाई पोजेटिभ देखिएको छ। उनीहरू बाँके डुडुवाका हुन् । भरतपुर अस्पतालमा गरिएको परीक्षणमा ६ जनालाई पोजेटिभ देखिएको छ । जसमध्ये कपिलवस्तुका ४ जना र नवलपरसीका २ जना रहेका छन् ।

राष्ट्रिय जनस्वास्थ्य प्रयोगशाला काठमाडौंमा गरिएको परीक्षणमा ८४ जनामा कोरोना संक्रमण पुष्टि भएको छ । उनीहरू कपिलवस्तुका २३ जना, रौतहटका ५६ जना, सर्लाहीका ४ जना रहेका छन् । रुपन्देहीको प्रदेशिक प्रयोगशलाका १६ जनाको पोजेटिभ आएको छ । उनीहरू कपिलवस्तुका १५ जना र रुपन्देहीका १ जना रहेका छन् ।

राप्ति स्वास्थ्य विज्ञान प्रतिष्ठानमा गरिएको परीक्षणमा ११ जनाको पोजेटिभ आएको छ । उनीहरूमध्ये दाङका २ जना रहेका छन् भने कपिलवस्तका ९ जना रहेका छन् । योसँगै नेपालमा कोरोना संक्रमितको संख्या १ हजार २ सय १२ पुगेको छ ।

आज देशका विभिन्न अस्पतालबाट कोरोना संक्रमणमुक्त भएर १९ जना डिस्चार्ज भएका छन् । आजसम्म संक्रमण मुक्त भएर डिस्चार्ज हुनेको संख्या २ सय ६ पुगेको छ । डिस्चार्ज हुनेमा १ सय ६२ जना पुरुष रहेका छन् भने ४४ जना महिला रहेका छन् ।

हालसम्म पीसीआर विधिबाटबाट ६४ हजार १ सय ५४ नमुना परीक्षण भएका छन् । त्यसैगरी, आरडीटी विधिबाट १ लाख ५ हजार ४ सय ७८ जनाको परीक्षण भएको स्वास्थ्य मन्त्रालयले जनाएको छ । २४ घण्टाको अवधिमा ३ हजार २ सय ३८ पीसीआर विधिबाट र ३ हजार ४ सय ४४ जनाको आरडीटी विधिबाट परीक्षण गरिएको छ ।