धनगढी, ११ जेठ-कैलालीको गौरीफन्टा नाकाबाट सीमावर्ती क्षेत्रमा अलपत्र परेका नेपालीहरुको उद्दार आज पनि जारी छ । जिल्ला प्रशासन कार्यालयको समन्वयमा भारतबाट विभिन्न क्षेत्रबाट गौरीफन्टा नाका सम्म पुगेकाहरुको उद्दार भइरहेको छ ।

जिल्ला प्रहरी कार्यालयका प्रवक्ता प्रहरी नायब उपरीक्षक दक्षकुमार बस्नेतले आज १ हजार ८ सय ९९ जनाको उद्दार गरिएको जानकारी दिए । सीमा नाकाबाट उद्दार गरिएकाहरुको कोरोना भाइरस परीक्षण हुन सकेको छैन् ।

उनीहरुलाई परीक्षण नगरी भित्र्याइएको प्रहरीले जनाएको छ । यसअघि गौरीफन्टा नाकाबाट पाँच दिनमा ८ हजार बढी नेपालीको उद्धार गरिएको थियो । गत २ जेठदेखि शनिबारसम्म नाकाबाट ८ हजार २ सय ७९ जनाको उद्धार गरिएको प्रहरीले जनाएको छ ।

जेठ २ र ३ गते ९ सय ५०, ७ गते ८ सय ५८ जना, ८ गते २ हजार ४ सय ९८जना , ९ गते २ हजार १४ जना र १० गते १ हजार ९ सय ५९ जनाको उद्धार गरिएको जिल्ला प्रहरी कार्यालय कैलालीले जनाएको छ ।

उद्धार गरिएका अधिकासंलाई सम्वन्धित पालिकामा पठाइएको छ । जिल्ला प्रहरी कार्यालय कैलालीका प्रहरी नायव उपरीक्षक दक्षकुमार बस्नेतले विभिन्न स्थानीय तह र सामाजिक संस्थाको सहयोगमा उद्धार गरिएका नेपालीलाई सम्बन्धित पालिकामा पठाउने कार्य भइरहेको बताए । ८ हजार बढीको उद्धार भएपनि कोरोना परीक्षण निकै कमको भएको छ ।