विराटनगर, जेठ १०–बन्दाबन्दीका कारण विहान बेलुका हातमुख जोर्न समस्या भएका विपन्न परिवारहरुलाई आज यहाँ युवा समूहले खाद्यान्न राहत वितरण गरेका छन् ।

विराटनगर महानगरपालिका वडा नं ११ का युवा मनिष गुरुङ एवं समूहले आफ्नो व्यक्तिगत रकममा बन्दाबन्दीको कारण दैनिक घरमा चुल्हो बाल्न समस्या भएका १५० परिवारलाई खाद्यान्न राहत वितरण गरेका हुन् ।

सामाजिक दुरी कायम गरी कुपन मार्फत वितरण गरिएको राहतमा १० किलो चामल, नून, आलु प्याज,दाल, खानेतेल, सावुन र मास्क रहेको छ । विपन्न परिवारका नागरिक र बालवालिकालाई भोकै सुत्न नपरोस भन्नका लागि केही सहयोग गरौ भन्ने उद्देश्यले व्यक्तिगत रुपमा खाद्यन्न उपलव्ध गराएको दाता मनिष गुरुङले बताए ।

विराटनगर ११ निवासी विपन्न महिला निशा साहले प्राप्त राहतले घरका बालबच्चालाई जाउँलो भएपनि केही दिन पेटभरी खुवाँउन पाउँदा खुशी लागेको बताइन् । समूहले केही दिन अगाडि तीन सय परिवारलाई राहत वितरण गरेको थियो भने आगामी वुधवार दुई सय परिवारलाई राहत वितरण गर्ने गुरुङले जानकारी दिए ।