हेटौँडा, १० जेठ-चितवनका कोरोना भाइरस (कोभिड–१९) संक्रमित दम्पति भारतबाट आएको खुलेको छ । भरतपुर महानगरपालिका–६ केशरबाघका ७४ वर्षीय वृद्ध र ७३ वर्षीया वृद्धालाई शुक्रबार कोभिड–१९ संक्रमणको पुष्टि भएको थियो ।

बागमती प्रदेशको सामाजि विकास मन्त्रालयले संक्रमित दम्पति भारतबाट आएर होम क्वारेन्टाइनमा बसिरहेको जानकारी दिएको छ । उनीहरूको भरतपुरस्थित कोरोना विशेष अस्पतालमा उपचार भइरहेको मन्त्रालयले जनाएको छ ।

क्यान्सरको उपचारको लागि संक्रमित दम्पति भारत गएको खुलेको छ । ७४ वर्षीय पुरुष राजधानी दिल्लीस्थित राजिव गान्धी क्यान्सर अस्पतालमा क्यान्सरको उपचार गराएर भरतपुर घर फर्किएको जनाइएको हो । उनकै श्रीमती ७३ वर्षीया महिला पनि सँगै दिल्ली गएकी थिइन्।

३ जेठमा दिल्लीबाट एम्बुलेन्समा घर आएको खुलेको छ । संक्रमित दम्पतिको सम्पर्कमा आएका व्यक्तिहरूको कन्ट्याक्ट ट्रेसिङबाट खोजी भइरहेको छ । भरतपुर महानगरपालिका र स्वास्थ्य कार्यालय चितवनबाट खटिएको टोलीले सम्पर्कमा आएका व्यक्तिहरूको खोजी र पृथकीकरण गर्न कार्य तीव्ररूपमा भइरहेको मन्त्रालयले जानकारी दिएको छ ।