एजेन्सी, जेठ ४–इजरायलमा नयाँ सरकारको शपथग्रहणभन्दा केही घण्टापहिले नै चिनियाँ राजदूतको रहस्यमय मृत्युले हलचल मच्चिएको छ । चिनियाँ राजदूत डू वेई तेलअभिवको हर्टजलियास्थित घरमा मृत फेला परेका थिए । यो घटनाको पुष्टि इजरायलको विदेश मन्त्रालयले गरिसकेको छ ।

इजरायली सञ्चारमाध्यमका अनुसार घटना थाहा भएलगत्तै प्रहरीले अनुसन्धान सुरू गरेको छ । अहिलेसम्म मृत्युको कारण खुल्न सकेको छैन । लामो समयको राजनीतिक गतिरोधपछि आइतबार बिहान बेन्जामिन नेतन्याहूले राष्ट्रपति पदको शपथ लिँदै थिए । हारेट्सको रिपोर्टअनुसार ५८ वर्षीय वेईको शव उनको ओछ्यानमै भेटिएको हो । निन्द्रामै उनको मृत्यु भएको आशंका गरिएको छ । परिवारमा उनकी श्रीमती र एक छोरा छन् ।

गत फेब्रुअरीमा उनी इजरायलका लागि चिनियाँ राजदूतका रूपमा नियुक्त भएका थिए । प्रारम्भिक जानकारीअनुसार वेईका कर्मचारीले उनलाई बेडमा मृत अवस्थामा देखेका थिए । उनको शरीरमा कुनै खालको चोट पाइएको छैन । म्यागन डेभिड एडोम प्राथमिक चिकित्सा सेवाले उनको मृत्युको कारण हृदयाघात हुन सक्ने बताएको बीबीसीले उल्लेख गरेको छ ।